ស.រ.អា ៖ ប្រធានាធិបតីអាមេរិកលោក ដូណាល់ ត្រាំ ត្រូវបានគេរំពឹងថា នឹងបង្ហាញព័ត៌មានលម្អិតនៃផែនការរបស់គាត់សម្រាប់ពន្ធគយឆ្លើយតបនៅថ្ងៃពុធនេះ។ សេតវិមាននិយាយថា «ពន្ធនឹងចូលជាធរមានភ្លាមៗ»។
ត្រាំគ្រោងនឹងថ្លែងសុន្ទរកថា នៅឯព្រឹត្តិការណ៍មួយដែលមានឈ្មោះថា «ធ្វើឱ្យអាមេរិកមានស្តុកស្តម្ភម្តងទៀត»នៅម៉ោង ៤ រសៀល ម៉ោងនៅសហរដ្ឋអាមេរិក ក្នុងទីក្រុងវ៉ាស៊ីនតោន។
អ្នកនាំពាក្យសេតវិមាននាង Karoline Leavitt បាននិយាយកាលពីថ្ងៃអង្គារថា លោកត្រាំកំពុងពិភាក្សាអំពីបញ្ហានេះជាមួយក្រុមអ្នកឯកទេសផ្នែកពាណិជ្ជកម្ម និងពន្ធ។
នាងបាននិយាយថា «ប្រធានាធិបតីមានក្រុមទីប្រឹក្សាដ៏អស្ចារ្យដែលបានសិក្សាពីបញ្ហាទាំងនេះអស់ជាច្រើនទសវត្សរ៍មកហើយ ហើយយើងកំពុងផ្តោតលើការស្តារយុគសម័យមាសរបស់អាមេរិកឡើងវិញ និងធ្វើឱ្យអាមេរិកក្លាយជាមហាអំណាចផលិតកម្ម»។
នាង Leavitt មិនបានផ្តល់ព័ត៌មានលម្អិតអំពីទំហំ និងវិសាលភាពនៃពន្ធគយ ឬប្រទេសណាខ្លះនឹងត្រូវកំណត់គោលដៅទេ។
ត្រាំត្រូវបានសួរកាលពីថ្ងៃចន្ទថា តើដៃគូពាណិជ្ជកម្មរបស់សហរដ្ឋអាមេរិកណាមួយនឹងត្រូវបានលើកលែង។ លោកបានឆ្លើយតបដោយនិយាយយ៉ាងសាមញ្ញថា «វាអាស្រ័យ»៕(ប្រែសម្រួលដោយ ពិសិដ្ឋ សំណាង)
