អ.ស.ប ៖ អង្គការសុខភាពពិភពលោកបាននិយាយកាលពីថ្ងៃទី ៣០ ខែមីនាថា ការរញ្ជួយផែនដីនៅមីយ៉ាន់ម៉ា គឺជាគ្រាអាសន្នកម្រិតកំពូល ខណៈដែលខ្លួនស្នើសុំជាបន្ទាន់នូវមូលនិធិចំនួន ៨ លានដុល្លារអាមេរិកដើម្បីជួយសង្គ្រោះជីវិតមនុស្ស និងការពារការផ្ទុះឡើងនៃជំងឺក្នុងរយៈពេល ៣០ ថ្ងៃខាងមុខ។
WHO បាននិយាយថា ចំនួនអ្នកស្លាប់ និងរបួសខ្ពស់ មានហានិភ័យខ្ពស់នៃការឆ្លងជំងឺ ដោយសារសមត្ថភាពវះកាត់នៅមានកម្រិតក្នុងប្រទេស ខណៈស្ថានភាពលាក់មុខនៅក្នុងប្រទេសមីយ៉ាន់ម៉ា មានន័យថា ការរញ្ជួយដីនេះទំនងជានឹងបង្កើនហានិភ័យនៃជំងឺ។
ទីភ្នាក់ងារសុខភាពអង្គការសហប្រជាជាតិនេះបាននិយាយនៅក្នុងការអំពាវនាវភ្លាមៗសម្រាប់មូលនិធិរបស់ខ្លួនថា«WHO បានចាត់ថ្នាក់វិបត្តិនេះថាជាគ្រាអាសន្នថ្នាក់ទី ៣ ដែលជាកម្រិតខ្ពស់បំផុតនៅក្រោមក្របខណ្ឌឆ្លើយតបគ្រាអាសន្នរបស់ខ្លួន»។
ការរញ្ជួយដីកម្រិត ៧,៧ រិច្ឆទ័រដំបូងបានវាយប្រហារនៅជិតទីក្រុង Mandalay ភាគកណ្តាលនៃប្រទេសមីយ៉ាន់ម៉ាកាលពីថ្ងៃទី ២៨ ខែមីនា បន្ទាប់មកប៉ុន្មាននាទីក្រោយមកក៏មានរំញ័រកម្រិត ៦,៧ រិច្ឆទ័រថែមទៀត។ ការរញ្ជួយដីនេះបានសម្លាប់មនុស្សជាង ១.៧០០ នាក់នៅក្នុងប្រទេសមីយ៉ាន់ម៉ា និងយ៉ាងហោចណាស់ ១៨ នាក់នៅក្នុងប្រទេសថៃជិតខាង។
នៅក្នុងប្រទេសមីយ៉ាន់ម៉ា «ការវាយតម្លៃបឋមបង្ហាញពីចំនួនអ្នកស្លាប់ និងរបួសជាច្រើន ដែលតម្រូវឲ្យមានការថែទាំបន្ទាន់។ ការផ្គត់ផ្គង់អគ្គិសនី និងទឹកនៅតែត្រូវបានរំខាន ដែលធ្វើឱ្យលទ្ធភាពទទួលបានសេវាសុខភាពកាន់តែអាក្រក់និងបង្កើនហានិភ័យនៃការផ្ទុះឡើងនៃជំងឺឆ្លងតាមទឹក និងអាហារ»។
«អ្នករងរបួសដែលទាក់ទងនឹងរញ្ជួយដី រួមទាំងការបាក់ឆ្អឹង របួសហើកចំហរ និងរោគសញ្ញាបាក់កម្លាំង គឺមានហានិភ័យខ្ពស់នៃការឆ្លងមេរោគ និងផលវិបាកនានា ដោយសារតែសមត្ថភាពវះកាត់មានកម្រិត និងការការពារ និងការគ្រប់គ្រងការឆ្លងមេរោគមិនគ្រប់គ្រាន់»៕(ប្រែសម្រួលដោយ ពិសិដ្ឋ សំណាង)
