កណ្តាល ៖ ជនសង្ស័យ២នាក់ដែលជាមុខ ឆក់ ប្លន់ ប្រដាប់អាវុធ២នាក់ ត្រូវបានកម្លាំងសមត្ថកិច្ចស្រុកអង្គស្នួល តាមបង្ក្រាបបានម្នាក់ភ្លាមៗក្រោយពីធ្វើសកម្មភាព ឆក់កាបូបពីប្រជាពលរដ្ឋម្នាក់នៅម្តុំផ្សារថ្នល់ទទឹង ផ្លូវជាតិលេខ៤រួចគេចខ្លួន មកជួបសមត្ថកិច្ចកំពុងពង្រាយកម្លាំងពួនស្ទាក់តាមភូមិសាស្ត្រ ។
ភ្លាមនោះជនសង្ស័យម្នាក់ត្រូវកម្លាំងឃាត់បានម្នាក់ រីឯម្នាក់ទៀតរត់គេចខ្លួនឡើងលើផ្លូវល្បឿនលឿន ទៅភ្ជង់ប្លន់យករថយន្ត GX470ពណ៍ស មួយគ្រឿងដើម្បីគេចខ្លួន ។
ហេតុការណ៍នេះ បង្កការភ្ញាក់ផ្អើលកាលពីវេលាម៉ោងប្រហែល១០ព្រឹក ថ្ងៃទី២៩ ខែ មីនា ២០២៥ ភូមិសាស្ត្រស្រុកអង្គស្នួល ខេត្តកណ្តាល ដែលបង្កឡើងដោយជនសង្ស័យ២នាក់ ជិះម៉ូតូ២គ្រឿង ១គ្រឿងម៉ាក ADV ពណ៌ខ្មៅនិង១គ្រឿងទៀត ម៉ាក Click ពណ៍ស ប្រដាប់ដោយអាវុធខ្លី២ដើម (១ដើមក្លែងក្លាយ )។
បើតាមសមត្ថកិច្ច ស្រុកអង្គស្នួលបានឱ្យដឹងថា ជនសង្ស័យជាមុខសញ្ញាចាស់ ដែលសមត្ថកិច្ចតាមប្រមាញ់ លុះនៅព្រឹកថ្ងៃទី២៩ ខែ មីនា ឆ្នាំ ២០២៥ លោកអធិការនគរបាលស្រុលអង្គស្នួល បានប្រកាសឱ្យគ្រប់បណ្តាគោលដៅ និងប៉ុស្តិ៍ចេញកម្លាំងល្បាតមើល ភិនភាគជនសង្ស័យ២នាក់ខាងលើនេះ ។
ប្រភពបានបន្តថា នៅម៉ោងប្រមាណជាង១០ព្រឹកថ្ងៃទី២៩មីនានេះ ជនសង្ស័យបានធ្វើសកម្មភាព ឆក់ ទៅលើជនរងគ្រោះកំពុងជិះម៉ូតូ នៅចំណុចផ្លូវជាតិលេខ៤ ម្តុំផ្សារថ្នល់ទទឹង រួចបានគេចខ្លួនតាមផ្លូវតូចៗក្នុងភូមិ ,ភ្លាមៗនោះកម្លាំងសមត្ថកិច្ច បានតាមឃាត់ខ្លួនជនសង្ស័យម្នាក់ និងជនសង្ស័យម្នាក់ទៀតរត់គេចខ្លួន ឡើងលើផ្លូវល្បឿនលឿននិងបានភ្ជង់យករថយន្តម៉ាក GX470ពណ៌ស ពីជនរងគ្រោះជិះលក្ខណៈគ្រួសារឱ្យជនរងគ្រោះចុះពីរថយន្តទាំងអស់ក្នុងរូបភាពនោះជិះគេចខ្លួន ដោយជិះគេចចេញ តាមច្រកកំពង់ស្ពឺកើត ត្រឡប់ក្រោយមកផ្លូជាតិលេខ៤វិញ ។
ក្នុងពេលកិច្ចប្រតិបត្តិការដែលសមត្ថកិច្ចដេញតាមជនសង្ស័យរត់គេចខ្លួននេះ ជនសង្ស័យបានផ្ទុះអាវុធមកលើកម្លាំងសមត្ថកិច្ច ហើយកម្លាំងសមត្ថកិច្ចបានស្ទាក់និងបានដេញមុខសញ្ញានេះត្រឡប់មកខាងផ្លូវជាតិលេខ៥១វិញ ហើយជនល្មើសបានផ្លុងរថយន្ត GX470 ពណ៌ស នោះចោល រួចគេចរត់ទៅ ភ្ជង់គំរាមបុរសម្នាក់ទៀត ដែលកំពុងឈប់រថយន្ត ដែលរថយន្តនោះម៉ាក LX 470ពណ៍ខ្មៅឱ្យឌុបជនសង្ស័យដើម្បីគេចពីការតាមប្រមាញ់ពីសមត្ថកិច្ច ។
ជមល្មើសបានគេចរហូតដល់ភូមិសាស្ត្រវត្តអង្គថ្ម ព្រំប្រទល់សង្កាត់ឪឡោក ខណ្ឌកំបូល ទើបជនសង្ស័យចុះគេចចូលព្រៃតាមវាលស្រែបាត់ស្រមោលតែម្តង ដោយមានអាវុធខ្លី១ដើមជាប់នឹងខ្លួន។
បើតាមការបំភ្លឺបញ្ជាក់ របស់ស្នងការនគរបាលខេត្តកណ្តាលថា ករណីនេះមិនមែនជាករណី ប្លន់ នៅផ្លូវល្បឿនលឿននោះទេ ជាករណីឆក់ទ្រព្យសម្បត្តិពីជនរងគ្រោះជិះម៉ូតូ នៅចំណុចផ្លូវជាតិលេខ៤។
បច្ចុប្បន្ន កម្លាំងជំនាញពាក់ព័ន្ធកំពុងតាមស្វែងរកជនសង្ស័យដែលរត់គេចខ្លួនមកផ្តន្ទាទោសតាមច្បាប់៕(ដោយ គាសំណាង)
