ស.រ.អា ៖ ប្រធានាធិបតីអាមេរិក លោក ដូណាល់ ត្រាំ បានប្រកាសជាផ្លូវការកាលពីថ្ងៃពុធអំពីការវាយពន្ធថ្មីចំនួន ២៥ភាគរយលើរថយន្តដែលផលិតពីបរទេសទាំងអស់ដែលនាំចូលមកកាន់សហរដ្ឋអាមេរិក ហើយយានជំនិះជប៉ុនក៏ត្រូវបានដាក់បញ្ចូលក្នុងវិធានការនេះដែរ។
លោកត្រាំបាននិយាយថា «វិធានការនេះនឹងចូលជាធរមាននៅថ្ងៃទី ២ ខែមេសា ហើយការប្រមូលពន្ធនឹងចាប់ផ្តើមនៅថ្ងៃទី ៣ ខែមេសា» ។ លោកបានបន្ថែមថា «វិធានការនេះនឹងមានជាអចិន្ត្រៃយ៍»។
លោកត្រាំបានប្រាប់អ្នកយកព័ត៌មានថា នឹងមិនមានពន្ធលើរថយន្តដែលផលិតនៅសហរដ្ឋអាមេរិកទេ។ គោលបំណងគឺនាំយកអាជីវកម្មត្រឡប់មកប្រទេសវិញ។
ប្រធានាធិបតីអាមេរិកបាននិងកំពុងសង្កត់ធ្ងន់ពីចេតនារបស់លោកក្នុងការយកពន្ធលើការនាំចូលរថយន្ត។ លោកបានទទូចថា រោងចក្រ និងការងារនៅអាមេរិកកំពុងរំកិលទៅក្រៅប្រទេសដោយសារចំនួនរថយន្តបរទេសដែលមានតម្លៃថោកនាំចូលច្រើនពេក។
ក្រុមហ៊ុនផលិតរថយន្តជប៉ុន ដែលនាំចេញរថយន្តជាច្រើនទៅកាន់សហរដ្ឋអាមេរិក កំពុងប្រឈមនឹងការព្រួយបារម្ភកាន់តែខ្លាំងឡើងលើផលប៉ះពាល់អវិជ្ជមានលើពួកគេ៕(ប្រែសម្រួលដោយ លោកសំណាង)
