កូរ៉េខាងត្បូង ៖ យ៉ាងហោចណាស់មនុស្ស ១៦ នាក់បានស្លាប់ដោយសារភ្លើងឆេះព្រៃជាច្រើនកន្លែងនៅទូទាំងតំបន់ភាគអាគ្នេយ៍នៃប្រទេសកូរ៉េខាងត្បូង។
ភ្លើងឆេះព្រៃដ៏សាហាវបានរាលដាលពាសពេញតំបន់ភាគអាគ្នេយ៍នៃប្រទេសកូរ៉េខាងត្បូងកាលពីថ្ងៃទី ២៥ ខែមីនាឆ្នាំ២០២៥ដោយបង្ខំឱ្យអ្នកស្រុករាប់សិបពាន់នាក់ភៀសខ្លួនចេញពីផ្ទះសម្បែង និងតំបន់ជិតខាង ដោយអាជ្ញាធរបានផ្ទេរអ្នកទោសរាប់ពាន់នាក់ចេញពីពន្ធនាគារផងដែរ។
គិតត្រឹមម៉ោង ៥ ព្រឹក ថ្ងៃទី ២៦ ខែមីនានេះ មនុស្ស ១២ នាក់បានស្លាប់នៅក្នុងភ្លើងឆេះព្រៃដែលចាប់ផ្តើមពីស្រុកUiseong ខណៈដែលអ្នកស្លាប់ ៤ នាក់ផ្សេងទៀតត្រូវបានផ្សារភ្ជាប់ទៅនឹងភ្លើងព្រៃមួយផ្សេងទៀតពីស្រុកSancheong ។នេះបើយោងតាមក្រសួងសុវត្ថិភាព។
ប្រធានាធិបតីស្តីទីលោក Han Duck-soo បានប្តេជ្ញាដាក់ពង្រាយឧទ្ធម្ភាគចក្រពន្លត់អគ្គិភ័យ និងបុគ្គលិកជើងគោកដើម្បីទប់ទល់នឹងភ្លើងឆេះ ដែលបណ្តាលមកពីខ្យល់បក់ខ្លាំង និងអាកាសធាតុស្ងួត។
ក្រសួងសុវត្ថិភាពបាននិយាយថា ស្ថានភាពស្ងួតនេះរំពឹងបន្តកើតមានក្នុងតំបន់ដែលរងគ្រោះដោយភ្លើងឆេះព្រៃនៅថ្ងៃទី ២៦ ខែមីនានេះ។
ទីភ្នាក់ងារសារព័ត៌មានយ៉ុនហាប់បានរាយការណ៍ថា ករណីរបួសនិងស្លាប់មួយចំនួនបានកើតឡើងនៅពេលដែលមនុស្សព្យាយាមរត់គេចពីភ្លើង ប៉ុន្តែរថយន្តរបស់ពួកគេបានក្រឡាប់។
អគ្គិភ័យ ដែលបានឆាបឆេះកាលពីថ្ងៃទី ២២ មីនា នៅតំបន់ Uiseong មិនទាន់ត្រូវបានទប់ស្កាត់នៅឡើយទេ ដោយបានបំផ្លាញប្រាសាទបុរាណ និងផ្ទះសម្បែងជាច្រើន។ រដ្ឋាភិបាលបានកំណត់តំបន់រងគ្រោះជាតំបន់គ្រោះមហន្តរាយពិសេស៕(ប្រែសម្រួលដោយ លោកសំណាង)
