ស.រ.អា ៖ សេតវិមានបានបញ្ជាក់កាលពីថ្ងៃទី ២៤ ខែមីនាថា អ្នកកាសែតអាមេរិកម្នាក់ត្រូវបានរួមបញ្ចូលដោយអចេតនាទៅក្នុងការជជែកជាក្រុម (Group Chat) ដែលក្នុងនោះរដ្ឋមន្ត្រីការពារជាតិលោក Pete Hegseth អនុប្រធានាធិបតីលោក J.D. Vance និងមន្ត្រីកំពូលអាមេរិកផ្សេងទៀតបានពិភាក្សាអំពីការវាយប្រហារនាពេលខាងមុខប្រឆាំងនឹងក្រុមឧទ្ទាម Houthi របស់យេម៉ែន។
ប្រធានាធិបតី ដូណាល់ ត្រាំ បានប្រកាសពីការវាយប្រហារកាលពីថ្ងៃទី ១៥ ខែមីនា ប៉ុន្តែនៅក្នុងការរំលោភសន្តិសុខដ៏គួរឱ្យភ្ញាក់ផ្អើលមួយ និពន្ធនាយកទស្សនាវដ្តី The Atlantic លោក Jeffrey Goldberg បានសរសេរថា គាត់មានពេលជាច្រើនម៉ោងនៃការជូនដំណឹងជាមុនតាមរយៈការជជែកជាក្រុមនៅលើ Signal ។
អ្នកនាំពាក្យក្រុមប្រឹក្សាសន្តិសុខជាតិ លោក Brian Hughes បាននិយាយថា «សារដែលត្រូវបានរាយការណ៍ហាក់ពិតប្រាកដ ហើយយើងកំពុងពិនិត្យមើលពីរបៀបដែលលេខដែលមិនប្រុងប្រយ័ត្ននេះ ត្រូវបានបញ្ចូលទៅក្នុងខ្សែសង្វាក់ផ្ញើសារនេះ»។
កាសែត New York Times បាននិយាយថា វាជាការបំពានមិនធម្មតានៃការស៊ើបការណ៍សន្តិសុខជាតិរបស់សហរដ្ឋអាមេរិក។ មិនត្រឹមតែអ្នកកាសែតត្រូវបានរួមបញ្ចូលដោយអចេតនាទៅក្នុងក្រុមប៉ុណ្ណោះទេ ប៉ុន្តែការសន្ទនាក៏បានធ្វើឡើងនៅខាងក្រៅបណ្តាញរដ្ឋាភិបាលដែលមានសុវត្ថិភាពផងដែរ ដែលជាធម្មតានឹងត្រូវប្រើសម្រាប់ការធ្វើផែនការសង្រ្គាមដែលមានលក្ខណៈសម្ងាត់ និងមានភាពរសើបខ្លាំង។
ទន្ទឹមនឹងនេះ លោកត្រាំបានប្រាប់អ្នកកាសែតថា «ខ្ញុំមិនដឹងអ្វីទាំងអស់អំពីវា។ អ្នកកំពុងប្រាប់ខ្ញុំអំពីវាជាលើកដំបូង»ហើយថែមទាំងនិយាយថា «ការវាយប្រហារមានប្រសិទ្ធភាពណាស់»ទោះក្នុងករណីណាក៏ដោយ។សេតវិមានបាននិយាយថា លោកប្រធានាធិបតី «បន្តមានទំនុកចិត្តជាខ្លាំងលើក្រុមសន្តិសុខជាតិរបស់លោក»។
លោក Goldberg បានសរសេរថា គណនីដែលហាក់តំណាងឱ្យលោក Vance រដ្ឋមន្ត្រីការបរទេសអាមេរិកលោកMarco Rubio នាយក CIA លោក John Ratcliffe នាយកទីភ្នាក់ងារស៊ើបការណ៍សម្ងាត់ជាតិលោក Tulsi Gabbard រដ្ឋមន្ត្រីរតនាគារលោក Scott Bessent នាយសេនាធិការសេតវិមាន Susie Wiles និងមន្ត្រីជាន់ខ្ពស់ក្រុមប្រឹក្សាសន្តិសុខជាតិ ត្រូវបានប្រមូលផ្តុំនៅក្នុងក្រុមជជែកនេះ។
លោក Joe Kent ដែលជាបេក្ខជនតែងតាំងរបស់លោកត្រាំសម្រាប់នាយកមជ្ឈមណ្ឌលប្រឆាំងភេរវកម្មជាតិ ក៏បង្ហាញខ្លួននៅក្នុងក្រុមជជែកនេះដែរ បើទោះបីជាមិនទាន់ត្រូវបានបញ្ជាក់ដោយព្រឹទ្ធសភាក៏ដោយ៕(ប្រែសម្រួលដោយ លោកសំណាង)
