ស.រ.អា. ៖ ប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃសុក្រ ទី៣១ មករាថា លោកនឹងដាក់ពន្ធថ្មីចំនួន ២៥ ភាគរយលើទំនិញពីម៉ិកស៊ិក និងកាណាដា និង ១០ ភាគរយលើការនាំចូលពីប្រទេសចិន ហើយគ្មានអ្វីអាចធ្វើបានដោយប្រទេសទាំងបីដើម្បីរារាំងពន្ធបានឡើយ។
ទោះជាយ៉ាងណាក៏ដោយ លោកត្រាំបានលើកលែងខ្លះចំពោះរ៉ែប្រេងពីប្រទេសកាណាដាដោយនិយាយថាអត្រានោះនឹងមាន ១០ ភាគរយធៀបនឹង ២៥ ភាគរយដែលបានគ្រោងទុកសម្រាប់ទំនិញផ្សេងទៀតពីប្រទេសជិតខាងភាគខាងជើងរបស់សហរដ្ឋអាមេរិក។ ប៉ុន្តែលោកបានបង្ហាញថា ពន្ធកាន់តែខ្ពស់លើប្រេង និងឧស្ម័នធម្មជាតិនឹងមកដល់នៅពាក់កណ្តាលខែកុម្ភៈ ជាសម្តីដែលធ្វើឱ្យតម្លៃប្រេងហក់ឡើងខ្ពស់។
លោកត្រាំ បានគំរាមពន្ធគយអស់ជាច្រើនសប្តាហ៍មកហើយ ដោយនិយាយថា ពន្ធនឹងត្រូវបានដាក់នៅថ្ងៃទី ១ ខែកុម្ភៈហើយនៅបន្តដាក់ដដែលរហូតដល់ប្រទេសនានាបានប្រឹងប្រែងបន្ថែមទៀតដើម្បីទប់ស្កាត់លំហូរជនចំណាកស្រុកនិង អាភៀន ឆ្លងកាត់ព្រំដែនសហរដ្ឋអាមេរិក។
ថ្លែងទៅកាន់អ្នកសារព័ត៌មាននៅក្នុងការិយាល័យពងក្រពើ ខណៈដែលគាត់កំពុងចុះហត្ថលេខាលើបទបញ្ជាប្រតិបត្តិលោកត្រាំបាននិយាយថា គាត់ដឹងថាពន្ធអាចបណ្តាលឱ្យមានការចំណាយខ្ពស់ចំពោះអ្នកប្រើប្រាស់ ហើយបានទទួលស្គាល់ថាសកម្មភាពរបស់គាត់អាចបណ្តាលឱ្យមានការរំខានក្នុងរយៈពេលខ្លី។ សេដ្ឋវិទូភាគច្រើនប៉ាន់ស្មានថាពន្ធនាំចូលដ៏ច្រើនបែបនេះ និងលទ្ធភាពសងសឹក នឹងរំខានដល់សកម្មភាពសេដ្ឋកិច្ចជុំវិញពិភពលោក។
នៅពេលសួរថា តើមានឱកាសណាមួយនៅដំណាក់កាលនេះសម្រាប់ដៃគូពាណិជ្ជកម្មកំពូលទាំងបីរបស់សហរដ្ឋអាមេរិកដើម្បីទទួលបានការពន្យារពេលគិតពន្ធដែរឬទេ លោកត្រាំបាននិយាយថា «ទេ ទេ មិនអាចធ្វើបានទេឥឡូវនេះ»។
លោកបានច្រានចោលគំនិតដែលថាគាត់គំរាមកំហែងដំឡើងពន្ធគឺជាឧបករណ៍ចរចា។ «ទេ វាមិនមែនទេ … យើងមានឱនភាពពាណិជ្ជកម្មធំជាមួយពួកគេទាំងបីណាស់»៕(ប្រែសម្រួលដោយ លោកសំណាង)
