វៀតណាម ៖ មានករណីគ្រោះអគ្គិភ័យបានឆាបឆេះនៅហាងតែ មួយកន្លែងនៅផ្លូវ Pham Van Dong ទីក្រុងហាណូយ កាលពីយប់ថ្ងៃពុធទី១៨ ធ្នូ ឆ្នាំ២០២៤ដែលបណ្តាលមកពីដបសាំង បណ្តាលឱ្យមនុស្សយ៉ាងហោចណាស់១១នាក់បាត់បង់ជីវិត។
ហាង«តែ» ដែលជាកន្លែងពេញនិយមសម្រាប់ការជួបជុំច្រៀងរាំ បានឆាបឆេះយ៉ាងសន្ធោសន្ធៅយ៉ាងលឿន ហើយរាលដាលដល់ផ្ទះជិតខាងថែមទៀត។
រថយន្តពន្លត់អគ្គិភ័យ និងរថយន្តរាប់សិបគ្រឿងត្រូវបានបញ្ជូនដើម្បីទប់ស្កាត់ការឆាបឆេះ។ នៅពេលគ្រប់គ្រងអគ្គិភ័យបានទាំងស្រុង ក្រុមជួយសង្គ្រោះបានស្វែងរកក្នុងអគារ ដោយយកចេញនូវសាកសពជាច្រើននាក់។
គិតត្រឹមម៉ោង ៣ ទៀបភ្លឺថ្ងៃព្រហស្បតិ៍នេះ ប៉ូលិសបានរកឃើញអ្នកស្លាប់ចំនួន ១១ នាក់។ ពួកគេបានជួយសង្គ្រោះមនុស្ស៧នាក់ផ្សេងទៀត ដោយ៥នាក់ស្ថិតក្នុងស្ថានភាពនឹងនរ និង២នាក់ទៀតសម្រាកនៅមន្ទីរពេទ្យ ។
រថយន្តសង្គ្រោះបានតម្រង់ជួរតាមផ្លូវ ខណៈអាជ្ញាធរព្យាយាមគ្រប់គ្រងស្ថានការណ៍ក្រោយសោកនាដកម្មនេះ។ បុរសដែលទទួលខុសត្រូវក្នុងការឆេះនេះ អាយុ ៥១ ឆ្នាំត្រូវបានចាប់ខ្លួន។
បុរសនោះបាននិយាយថា «គាត់បានមកផឹកស្រាបៀរ ហើយមានជម្លោះជាមួយបុគ្គលិក ទើបគាត់ចាក់សាំងចូលក្នុងហាងដុតជាន់ទីមួយ និងបិទច្រកចេញសម្រាប់អ្នកនៅខាងក្នុង។
វីដេអូកាមេរ៉ាសុវត្ថិភាពបានបង្ហាញថា បុរសម្នាក់កាន់ដបសាំងសំដៅទៅហាងទឹកតែនៅវេលាម៉ោង១១និង០១នាទីយប់។ ហើយភ្លើងបានឆាបឆេះមួយសន្ទុះក្រោយមកតែម្តង៕(ប្រែសម្រួលដោយ លោកសំណាង)
