កំពង់ស្ពឺ ៖ មានករណីគ្រោះថ្នាក់ចរាចរណ៍លេីផ្លូវល្បឿនលឿន K20+300 ស្លាប់០១ របួសច្រើននាក់ បង្កឡើងដោយរថយន្ត ៣គ្រឿងPrius , Mercedes និង Hyundai កើតឡើងនាព្រឹកថ្ងៃទី១៥ ខែធ្នូ ឆ្នាំ២០២៤ លើផ្លូវល្បឿនលឿនចំណុច K20+300 ទិសដៅពីភ្នំពេញ ទៅព្រះសីហនុ ត្រង់ចំណុចភូមិរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ ។
សមត្ថកិច្ចនិយាយថា ដំបូងមានរថយន្ដ ១គ្រឿង ម៉ាកToyota Prius ពណ៌ក្រហម ផ្លាកលេខភ្នំពេញ 2BA-2806 អ្នកបើកបរឈ្មោះ TSANG HINGCHUNG (សាំង ហ៊ីងឈុង) ភេទប្រុស អាយុ ៥៥ឆ្នាំ ជាជនជាតិចិន ស្នាក់នៅភូមិឃ្មួញ សង្កាត់សែនសុខ ខណ្ឌសែនសុខ រាជធានីភ្នំពេញ បើកបរពីទិសខាងកើតទៅទិសខាងលិច ។
លុះមកដល់ចំណុចខាងលើបានបុកប៉ះរថយន្តផ្នែកពីក្រោយម៉ាក Hyundai ពណ៌ខៀវ ផ្លាកលេខ ឃ4370-ភត2 (មានដឹកបន្ទះក្ដារ) អ្នកបើកបរឈ្មោះ ឌិន ប៊ុនថុន ភេទប្រុស អាយុ៣៨ឆ្នាំនៅភូមិដើមស្លែង សង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ អ្នករួមដំណើរជាមួយម្នាក់ឈ្មោះ សុខ កុសល ភេទប្រុស អាយុ ៣៩ឆ្នាំ ស្នាក់នៅភូមិស្តៅស្រលែង ឃុំដីឥដ្ឋ ស្រុកកៀនស្វាយ ខេត្តកណ្តាល ដែលកំពុងបើកបរពីទិសខាងកើតទៅលិច បណ្ដាលឱ្យគ្រោះថ្នាក់ក្រឡាប់ ។
សមត្ថកិច្ចបន្តថា បន្ទាប់មកក៏មានរថយន្ដ១គ្រឿង ម៉ាកMercedes ពណ៌ស ផ្លាកលេខភ្នំពេញ 2BP- 7869 អ្នកបើកបរឈ្មោះ LI WEN BING (លី វ៉េនពីង)ជនជាតិចិន ភេទប្រុស អាយុ៣២ឆ្នាំ ស្នាក់នៅភូមិ២ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ បើកបរពីទិសខាងកើតទៅលិច កំពុងតែបេីកបរក្នុងល្បឿនលឿន រួចបានកិននិងប៉ះជាមួយបន្ទះក្តារដែលធ្លាក់លើផ្លូវ បណ្ដាលឱ្យគ្រោះថ្នាក់ និងខូចខាតរថយន្ត ។
យោងតាមការបញ្ជាក់ពីលោកវរសេនីយ៍ឯក ឃុត សុផល អធិការនគរបាលស្រុកសំរោងទង ថា«ហេតុការណ៍ខាងលេី បានបណ្ដាលឱ្យមានការរងរបួសនិងស្លាប់មនុស្សម្នាក់ ឈ្មោះឌិន ប៊ុនថុន និង របួសធ្ងន់មនុស្សម្នាក់ប្រុស ឈ្មោះសុខ កុសល របួសស្រាលមនុស្ស ២នាក់ប្រុស (ជនជាតិចិន) ,ឯរថយន្ដ ៣គ្រឿង ខូចខាតធ្ងន់២គ្រឿង (Toyota prius - Hyundai ខូចស្ទេីរទាំងស្រុង ) និង Mercedes»។
ចំពោះវត្ថុតាងទាំងរថយន្ដ ទាំង ៣គ្រឿង សមត្ថកិច្ចនគរបាលបានយករក្សាទុកនៅស្នាក់ការបញ្ជរកំពង់ស្ពឺខាងកើតK26 រង់ចាំដោះស្រាយបន្ដតាមនីតិវិធី៕(ដោយ SAKARA)
