រថយន្តប្រដេញគ្នា ទៅបុកអ្នកធ្វើដំណើរ ស្លាប់ម្នាក់ជានាយករងសាលា

ភ្នំពេញ ៖ បុរសម្នាក់បានបាត់បង់ជីវិត ខណៈកំពុងជិះម៉ូតូ ត្រូវរថយន្តមកបុកពេញទំហឹង កាលពីវេលាម៉ោង ៣និង១៥នាទីទៀបភ្លឺ ឈានចូលថ្ងៃទី២៩ ខែវិច្ឆិកា ឆ្នាំ២០២៤ ចំណុចក្បែរក្លឹបមីតណាយ ស្ថិតនៅលើផ្លូវវេងស្រេង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។ 

បុរសរងគ្រោះមានឈ្មោះ ហម សុខឃៀង អាយុ២៥ឆ្នាំ មុខរបរ ជានាយរង សាលាបែលធីមួយកន្លែងបច្ចុប្បន្ន រស់នៅរាជធានីភ្នំពេញ ជិះម៉ូតូម៉ាកហុងដាPCX ពណ៌ស ពាក់ស្លាកលេខ ភ្នំពេញ 1KV-9152 ឯរថយន្តបង្ក ម៉ាកLexus RX300 ពណ៌ស ពាក់ស្លាកលេខ ភ្នំពេញ 2AB-6691 និង រថយន្តLexus LX470 ពណ៌ស ពាក់ស្លាកលេខ កណ្តាល 2D-0277។ 

ប្រភពពីកន្លែងកើតហេតុបានឲ្យដឹងថា នៅមុនពេលកើតហេ តុគេឃើញរថយន្តចំនួន២គ្រឿង មួយគ្រឿងម៉ាកLexus RX300 និង Lexus LX470 បើកប្រដេញគ្នាតាមដងផ្លូវវេងស្រេង ក្នុងទិសដៅពីកើតមកលិចក្នុងល្បឿនលឿនដូចហោះ ( មិនដឹងបើកប្រណាំងលេងឬមានជម្លោះនោះទេ) ខណៈមកដល់ចំណុចកើតហេតុ រថយន្តបង្កម៉ាក Lexus RX300បានជ្រុលទៅបុករះម៉ូតូដែលបើកបរដោយជនរងគ្រោះ ហើយរថយន្តបង្កបន្តទៅបុករះកង់បីឥណ្ឌាចំនួន២គ្រឿងទៀត ដែលចតចោលនៅឯបដងផ្លូវវេងស្រេង។ ឃើញបែបនេះ រថយន្តម៉ាកLexusLX470 បានបើកគេចខ្លួនបាត់ នៅសល់រថយន្តបង្ក ត្រូវពលរដ្ឋនិងសមត្ថកិច្ចឃាត់អ្នកបើកបរបាន។ 

សមត្ថកិច្ចបានកវាស់វែង យករថយន្តនិងម៉ូតូទៅរក្សារទុក រង់ចាំការដោះស្រាយនៅពេលក្រោយ ចំណែកសព ត្រូវក្រុមគ្រួសារយកទៅធ្វើបុណ្យតាមប្រពៃណី៕ BBN02