បរទេស ៖ ប្រធានាធិបតីអាមេរិក ចូ បៃដិន បាននិយាយកាលពីថ្ងៃទី ២៦ ខែវិច្ឆិកាឆ្នាំ២០២៤ថា «បទឈប់បាញ់គ្នារវាងអ៊ីស្រាអែល និងក្រុមហេសប៊ូឡារបស់លីបង់» នឹងចូលជាធរមាននៅថ្ងៃទី ២៧ ខែវិច្ឆិកានេះ បន្ទាប់ពីភាគីទាំងពីរបានទទួលយកកិច្ចព្រមព្រៀងដែលសម្របសម្រួលដោយសហរដ្ឋអាមេរិក និង បារាំង។
លោកបៃដិនបាននិយាយថា កិច្ចព្រមព្រៀងដែលបើកផ្លូវសម្រាប់ការបញ្ចប់ជម្លោះដែលបានសម្លាប់មនុស្សរាប់ពាន់នាក់ចាប់តាំងពីវាត្រូវបានបញ្ឆេះដោយសង្រ្គាមហ្គាហ្សាក្នុងឆ្នាំ២០២៣ ត្រូវបានរៀបចំឡើងដើម្បីជាការបញ្ចប់អរិភាពជាអចិន្ត្រៃយ៍។
លោកបៃដិន ដែលបានថ្លែងសុន្ទរកថានៅសេតវិមានភ្លាមៗ បន្ទាប់ពីគណៈរដ្ឋមន្ត្រីសន្តិសុខរបស់អ៊ីស្រាអែលបានអនុម័តកិច្ចព្រមព្រៀងនេះក្នុងសំឡេង ១០-១ បាននិយាយថាលោកបាននិយាយទៅកាន់នាយករដ្ឋមន្ត្រីអ៊ីស្រាអែលBenjamin Netanyahu និងនាយករដ្ឋមន្ត្រីលីបង់ Najib Mikati ។
លោកបាននិយាយថា ការប្រយុទ្ធគ្នាឆ្លងព្រំដែនរវាងអ៊ីស្រាអែលនិងលីបង់ នឹងបញ្ចប់នៅម៉ោង ៤ ព្រឹក ម៉ោងក្នុងស្រុក(ម៉ោង ១០ ព្រឹក ម៉ោងនៅកម្ពុជា) ។
លោកបៃដិនបាននិយាយថា «កិច្ចព្រមព្រៀងនេះត្រូវបានបង្កើតឡើងដើម្បីជាការបញ្ឈប់អរិភាពជាអចិន្ត្រៃយ៍។ អ្វីដែលនៅសេសសល់ពីក្រុមហេសប៊ូឡានិងអង្គការភេរវកម្មផ្សេងទៀត នឹងមិនត្រូវបានអនុញ្ញាតឱ្យគំរាមកំហែងដល់សន្តិសុខរបស់អ៊ីស្រាអែលម្តងទៀតឡើយ»។
លោកបៃដិនបាននិយាយថា អ៊ីស្រាអែលនឹងដកកងកម្លាំងរបស់ខ្លួនជាបណ្តើរៗក្នុងរយៈពេល ៦០ ថ្ងៃ ក្នុងពេលដែលកងទ័ពរបស់លីបង់កាន់កាប់ទឹកដីនៅជិតព្រំដែនរបស់ខ្លួនជាមួយអ៊ីស្រាអែល ដើម្បីធានាថា ក្រុមហេសប៊ូឡានឹងមិនសាងសង់ហេដ្ឋារចនាសម្ព័ន្ធរបស់ខ្លួនឡើងវិញនៅទីនោះ។
លោកបានថ្លែងថា «ជនស៊ីវិលទាំងសងខាងនឹងអាចវិលត្រឡប់ទៅសហគមន៍របស់ពួកគេវិញបានក្នុងពេលឆាប់ៗនេះ»។
ប្រធានាធិបតីបារាំងលោក Emmanuel Macron បានអបអរសាទរការចុះហត្ថលេខាលើកិច្ចព្រមព្រៀងនៅលើវេទិកាបណ្តាញសង្គម X ដោយនិយាយថាវាជា «ចំណុចកំពូលនៃកិច្ចខិតខំប្រឹងប្រែងដែលបានធ្វើឡើងអស់រយៈពេលជាច្រើនខែជាមួយអាជ្ញាធរអ៊ីស្រាអែល និងលីបង់ ដោយកិច្ចសហការយ៉ាងជិតស្និទ្ធជាមួយសហរដ្ឋអាមេរិក»។
រដ្ឋមន្ត្រីការបរទេសលីបង់ លោក Abdallah Bou Habib មុននេះ បាននិយាយថា កងទ័ពលីបង់នឹងត្រៀមខ្លួនជាស្រេច ដើម្បីដាក់ពង្រាយទាហានយ៉ាងហោចណាស់ ៥.០០០ នាក់ នៅភាគខាងត្បូងប្រទេសលីបង់ នៅពេលកងទ័ពអ៊ីស្រាអែលដកចេញ៕(ប្រែសម្រួលដោយ លោកសំណាង)
