វៀតណាម ៖ បុរសម្នាក់នៅខេត្ត Dong Nai ភាគខាងត្បូងបានយករថយន្តមកតាំងពីលើខ្លោងទ្វារផ្ទះរបស់គាត់សម្រាប់ហេតុផលអនុស្សាវរីយ៍នានា ដោយទាក់ទាញចំណាប់អារម្មណ៍យ៉ាងខ្លាំងពីអ្នកធ្វើដំណើរ ដែលបើកបរឆ្លងកាត់។
លោក Pham Anh Duc អាយុ ៥០ ឆ្នាំបាននិយាយកាលពីថ្ងៃព្រហស្បតិ៍ថា រថយន្តនេះគឺជារថយន្តដំបូងដែលគ្រួសាររបស់គាត់បានកាន់កាប់អស់រយៈពេលជាង ២០ ឆ្នាំមកហើយ ចាប់តាំងពីពួកគេបានចាកចេញពីស្រុកកំណើតរបស់ពួកគេនៅភាគកណ្តាលប្រទេសវៀតណាមដើម្បីទៅតាំងទីលំនៅនៅ ខេត្ត Dong Nai ។
គ្រួសារនេះមានឡានថ្មីហើយ តែដោយសារឡានចាស់មិនបានប្រើជាច្រើនឆ្នាំ ទើបគាត់ចង់ធ្វើអ្វីមួយជាមួយវាក្នុងគោលបំណងរំលឹកអនុស្សាវរីយ៍។
លោក Duc និយាយថា «អត់មានកន្លែងចតទេ ដូច្នេះខ្ញុំសម្រេចចិត្តយកឡានចាស់មកដាក់ពីលើខ្លោងទ្វារផ្ទះតែម្តង។កម្មករបានប្រើធ្នឹមដែកជាច្រើនដើម្បីទ្រឡាននៅនឹងមួយកន្លែង», ដោយបន្ថែមថា «គាត់នឹងមិនលក់ឡាននេះទេព្រោះគ្រួសារចង់ទុកវាសម្រាប់ជាប្រយោជន៍ដល់អនុស្សាវរីយ៍»។
មនុស្សជាច្រើនបានឈប់ដើម្បីថតរូបរថយន្ត ហើយបង្ហោះលើបណ្ដាញសង្គម។ ទោះយ៉ាងណាក៏មានអ្នកខ្លះសម្ដែងការព្រួយបារម្ភថារថយន្តអាចធ្លាក់ចុះមកបង្កគ្រោះថ្នាក់ដល់មនុស្ស។
មន្ត្រីគណៈកម្មាធិការប្រជាជនសង្កាត់ Long Binh បាននិយាយថា ពួកគេបានស្នើឱ្យប៉ូលិសមូលដ្ឋានចុះពិនិត្យទីតាំងនោះហើយ។ បើការយករថយន្តដាក់លើខ្លោងទ្វារខុសច្បាប់ និងបង្កគ្រោះថ្នាក់ដល់ប្រជាពលរដ្ឋ អាជ្ញាធរនឹងទាមទារឱ្យយករថយន្តចុះវិញ៕(ប្រែសម្រួលដោយ លោកសំណាង)
