បរទេស ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយថា ការវាយប្រហារដោយកងកម្លាំងរបស់លោកទៅលើទីក្រុង Dnipro ភាគខាងកើតប្រទេសអ៊ុយក្រែន កាលពីព្រឹកថ្ងៃព្រហស្បតិ៍ ត្រូវបានធ្វើឡើងដោយប្រើ «មីស៊ីលរយៈចម្ងាយមធ្យមធម្មតាថ្មីមួយ»។
លោកបាននិយាយថា មីស៊ីល ឈ្មោះថា Oreshnik គឺជាការឆ្លើយតបទៅនឹងការប្រើប្រាស់អាវុធរយៈចម្ងាយឆ្ងាយរបស់អ៊ុយក្រែនរបស់សហរដ្ឋអាមេរិក និងចក្រភពអង់គ្លេស ដើម្បីវាយប្រហារគោលដៅនៅក្នុងទឹកដីរុស្ស៊ី។
លោកពូទីនបានបន្ថែមថា រុស្ស៊ីអាចនឹងវាយប្រហារទីតាំងយោធានៃប្រទេសទាំងឡាយណាដែលអនុញ្ញាតឱ្យអាវុធរបស់ពួកគេប្រើប្រាស់សម្រាប់គោលបំណងនេះ។
សហរដ្ឋអាមេរិក និងចក្រភពអង់គ្លេសបានអនុញ្ញាតឱ្យប្រើប្រាស់មីស៊ីល ATACMS របស់សហរដ្ឋអាមេរិក និងមីស៊ីលStorm Shadow ដែលផ្គត់ផ្គង់ដោយចក្រភពអង់គ្លេសក្នុងសប្តាហ៍នេះ នៅក្នុងការផ្លាស់ប្តូរគោលនយោបាយដ៏សំខាន់មួយ។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយថា ការប្រើប្រាស់មីស៊ីលថ្មីរបស់រុស្ស៊ី គឺជា «ការបង្កើនយ៉ាងច្បាស់ក្រឡែត និងធ្ងន់ធ្ងរនៅក្នុងទំហំ និងភាពឃោរឃៅនៃសង្រ្គាមនេះ»។
លោកបានសរសេរនៅលើទំព័រ X ថា «[នេះ] ជាភស្តុតាងបន្ថែមទៀតថា រុស្ស៊ីគ្មានចំណាប់អារម្មណ៍លើសន្តិភាពទេ»ដោយបន្ថែមថា «លោកពូទីន មិនត្រឹមតែកំពុងអូសបន្លាយសង្រ្គាមប៉ុណ្ណោះទេ តែលោកកំពុងស្ដោះទឹកមាត់ដាក់មុខអ្នករាល់គ្នានៅក្នុងពិភពលោក ដែលចង់បានសន្តិភាពពិតប្រាកដ»។
មុននេះ លោកហ្សេលេនស្គីបាននិយាយថា មីស៊ីលនេះមានលក្ខណៈជាមីស៊ីលផ្លោងអន្តរទ្វីប (ICBM) ទោះបីមន្ត្រីលោកខាងលិចមានការសង្ស័យលើទ្រឹស្តីនេះក៏ដោយ។
ទន្ទឹមនឹងនេះ ក្រុមប្រឹក្សាសន្តិសុខជាតិអាមេរិកបាននិយាយថា «ការសាកល្បងមីស៊ីលផ្លោងរយៈចម្ងាយមធ្យម» ត្រូវបានប្រើប្រាស់ប្រឆាំងនឹងអ៊ុយក្រែន ដោយបន្ថែមថា រុស្ស៊ីប្រហែលជាមានអាវុធទាំងនេះតិចតួចប៉ុណ្ណោះ ហើយថាពួកវានឹងមិនក្លាយជាអ្នកផ្លាស់ប្តូរស្ថានការណ៍នៅក្នុងសង្រ្គាមនោះទេ៕(ប្រែសម្រួលដោយ លោកសំណាង)
