បរទេស ៖ រដ្ឋមន្ត្រីការបរទេសអាមេរិក លោក Antony Blinken បាននិយាយកាលពីថ្ងៃពុធ ទី២៣ តុលាឆ្នាំ២០២៤ថា«ឥឡូវជាពេលត្រូវបញ្ចប់សង្គ្រាមនៅតំបន់ហ្គាហ្សាហើយ ហើយជំរុញអ៊ីស្រាអែលឱ្យជៀសវាងការបង្កើនកម្តៅជាមួយអ៊ីរ៉ង់»។
អ៊ីស្រាអែលកំពុងប្រយុទ្ធប្រឆាំងនឹងក្រុមហាម៉ាសដែលគាំទ្រដោយអ៊ីរ៉ង់នៅតំបន់ហ្គាហ្សា និងក្រុមហេសប៊ូឡាក្នុងប្រទេសលីបង់ ហើយបានប្តេជ្ញាសងសឹកអ៊ីរ៉ង់ចំពោះការវាយប្រហារដោយមីស៊ីលថ្ងៃទី ១ តុលាកន្លងទៅ។
នៅភាគខាងត្បូងប្រទេសលីបង់ ការវាយប្រហាររបស់អ៊ីស្រាអែលបានវាយចំទីក្រុង Tyre ដោយបណ្តាលឲ្យភាគកណ្តាលខ្ទេចខ្ទាំ និងបង្កឱ្យមានការចាកចេញថ្មីពីទីក្រុងឆ្នេរសមុទ្រដែលធ្លាប់តែរស់រវើក។
អ្នកស្រុកឈ្មោះ Rana ដែលបានភៀសខ្លួនទៅកាន់មាត់សមុទ្របន្ទាប់ពីយោធាអ៊ីស្រាអែលបានចេញការព្រមានឲ្យជម្លៀសខ្លួនចេញ បាននិយាយថា «ទីក្រុងទាំងមូលបានញ័ររង្គើ»។
លោក Bilal Kashmar នៃអង្គភាពគ្រប់គ្រងគ្រោះមហន្តរាយរបស់ទីក្រុង Tyre បាននិយាយថា អគារចំនួនប្រាំពីរបានរាបដល់ដី និងផ្ទះល្វែងជាង ៤០០ បានខូចខាត។
លោកបានប្រាប់ទីភ្នាក់ងារសារព័ត៌មាន AFP ថា «អ្នកអាចនិយាយបានថាប្រជាជននៅទីក្រុង Tire ទាំងមូលត្រូវបានជម្លៀសចេញ។ ផ្សែងខ្មៅឃើញហុយចេញពីសង្កាត់ជាច្រើន ដោយតំបន់ខ្លះស្ថិតនៅចម្ងាយត្រឹមតែ ៥០០ ម៉ែត្រពីប្រាសាទបុរាណរបស់ទីក្រុង»។
អង្គការយូណេស្កូបាននិយាយថា ខ្លួនកំពុង «តាមដានយ៉ាងដិតដល់»ផលប៉ះពាល់នៃជម្លោះលើតំបន់បេតិកភណ្ឌពិភពលោករបស់ទីក្រុង Tyre៕(ប្រែសម្រួលដោយ លោកសំណាង)
