ជប៉ុន ៖ ទូរទស្សន៍សាធារណៈ NHK និងប្រព័ន្ធផ្សព្វផ្សាយជប៉ុនផ្សេងទៀតបានរាយការណ៍ថា «បុរសម្នាក់បានគប់ដបសាំងជាច្រើនចូលទីស្នាក់ការគណបក្សកាន់អំណាចរបស់ជប៉ុន ក្នុងទីក្រុងតូក្យូកាលពីថ្ងៃសៅរ៍ ទី១៩ តុលាឆ្នាំ២០២៤។មិនមានរបាយការណ៍ពីអ្នករបួសទេ។
ប៉ូលិសក្រុងតូក្យូបានបដិសេធមិនធ្វើអត្ថាធិប្បាយទេ ដោយកត់សម្គាល់ថារឿងនេះកំពុងស្ថិតក្រោមការស៊ើបអង្កេតនៅឡើយ។ សេចក្តីរាយការណ៍បានបន្តថា បុរសដែលត្រូវចាប់ខ្លួននៅនឹងកន្លែងនោះ បានបើករថយន្តចូលទៅក្បែររបង។ ចេតនារបស់គាត់ចំពោះការវាយប្រហារនេះមិនទាន់ដឹងច្បាស់នៅឡើយទេ។
គណបក្សប្រជាធិបតេយ្យសេរី (LDP) ដែលកំពុងកាន់អំណាច កាន់តែមិនមានការពេញនិយមពីសំណាក់សាធារណជន ដោយសារតែរឿងអាស្រូវលុយដ៏សន្ធឹកសន្ធាប់ពាក់ព័ន្ធនឹងការផ្តល់មូលនិធិគួរឱ្យសង្ស័យ និងការសង្ស័យថា«មានការគេចវេសពន្ធ»។
គណបក្សប្រជាធិបតេយ្យសេរី (LDP) បានបដិសេធមិនធ្វើអត្ថាធិប្បាយលើការវាយប្រហារកាលពីថ្ងៃសៅរ៍ទេ ដោយបង្វែរសំណួរទាំងអស់ឱ្យទៅសួរប៉ូលិស។
ការបោះឆ្នោតសម្រាប់សភាជាន់ទាបគ្រោងធ្វើនៅថ្ងៃទី ២៧ ខែតុលាឆ្នាំ២០២៤ខាងមុខ ។ អ្នកនយោបាយមានកេរ្តិ៍ឈ្មោះអសោចមួយចំនួនបានបាត់បង់ការគាំទ្រជាផ្លូវការពីគណបក្សកាន់អំណាច ប៉ុន្តែកំពុងឈរឈ្មោះលក្ខណៈឯករាជ្យ។
គណបក្សទើបជ្រើសរើសមេដឹកនាំថ្មីគឺនាយករដ្ឋមន្ត្រី Shigeru Ishiba ដោយសង្ឃឹមថានឹងបង្ហាញរូបភាពថ្មី។ ប៉ុន្តែការស្ទង់មតិបង្ហាញពីប្រជាប្រិយភាពរបស់ខ្លួនធ្លាក់ចុះ តែយ៉ាងណាបក្សនៅតែមិនច្បាស់ថាតើពួកគេនឹងបាត់បង់កៅអីភាគច្រើនរបស់ពួកគេនៅសភាជាន់ទាបនៅក្នុងការបោះឆ្នោតនាពេលខាងមុខឬយ៉ាងណាទេ ដោយសារតែក្រុមប្រឆាំងនៅតែបែកបាក់គ្នា៕(ប្រែសម្រួលដោយ លោកសំណាង)
