បរទេស ៖ យោធាអ៊ីស្រាអែលបាននិយាយថា ដ្រូនរបស់ហេសប៊ូឡាបានសម្លាប់ទាហានបួននាក់នៅឯមូលដ្ឋានភាគខាងជើងរបស់ខ្លួនកាលពីថ្ងៃអាទិត្យ ទី១៣ តុលា ឆ្នាំ២០២៤ ខណៈអ៊ីស្រាអែលបានពង្រីកការទម្លាក់គ្រាប់បែករបស់ខ្លួននៅក្នុងប្រទេសលីបង់ ហើយកងទ័ពបានប្រយុទ្ធជាមួយពួកសកម្មប្រយុទ្ធឆ្លងព្រំដែន។
ការវាយប្រហារលើជំរំហ្វឹកហ្វឺនយោធានៅទីក្រុង Binyamina ក្បែរទីក្រុង Haifa គឺជាការវាយប្រហារដ៏សាហាវបំផុតលើមូលដ្ឋានអ៊ីស្រាអែលចាប់តាំងពីថ្ងៃទី ២៣ ខែកញ្ញា នៅពេលដែលអ៊ីស្រាអែល បង្កើនការវាយប្រហារលើក្រុមហេសប៊ូឡាក្នុងប្រទេសលីបង់។ សេវាសង្គ្រោះបន្ទាន់បានរាយការណ៍ថា មនុស្សជាង ៦០ នាក់បានរងរបួស។
ជាមួយគ្នានេះដែរ អាជ្ញាធរក្នុងតំបន់ហ្គាហ្សាបាននិយាយថា ចំនួនអ្នកស្លាប់ដោយសារការវាយប្រហាររបស់អ៊ីស្រាអែលកាលពីថ្ងៃអាទិត្យទៅលើសាលារៀនមួយកន្លែង ដែលត្រូវបានប្រើប្រាស់ជាជម្រកសម្រាប់ជនភៀសខ្លួនបានកើនឡើងដល់ ១៥នាក់ រួមទាំងគ្រួសារទាំងមូលផងដែរ។
ខណៈដែលការប្រយុទ្ធគ្នាបានផ្ទុះឡើងរវាងកងកម្លាំងអ៊ីស្រាអែល និងក្រុមហេសប៊ូឡា នៅភាគខាងត្បូងប្រទេសលីបង់ កងរក្សាសន្តិភាពអង្គការសហប្រជាជាតិបាននិយាយថា ពួកគេកំពុងស្ថិតនៅខ្សែត្រៀមប្រយុទ្ធជាថ្មី។
ពួកគេបាននិយាយថា ទាហានអ៊ីស្រាអែល «បានបង្ខំ»ចូលទៅក្នុងទីតាំងរបស់អង្គការសហប្រជាជាតិ ជាមួយនឹងរថក្រោះពីរគ្រឿង បន្ទាប់ពីនាយករដ្ឋមន្ត្រីអ៊ីស្រាអែល Benjamin Netanyahu បានអំពាវនាវឱ្យកងកម្លាំងអ.ស.ប.ដកខ្លួនចេញពីតំបន់នោះ។
យោធាអ៊ីស្រាអែលបាននិយាយថា រថក្រោះមួយគ្រឿងបានចូលទៅក្នុងប៉ុស្តិ៍យាមរបស់អ.ស.ប. ខណៈកំពុងរងការបាញ់ប្រហារ៕(ប្រែសម្រួលដោយ លោកសំណាង)
