កូរ៉េខាងជើង ៖ ប្រព័ន្ធផ្សព្វផ្សាយរដ្ឋ KCNA បាននិយាយកាលពីថ្ងៃទី ៨ ខែតុលាឆ្នាំ២០២៤ថា មេដឹកនាំកូរ៉េខាងជើងលោក គីម ជុងអ៊ុន បាននិយាយថា ប្រទេសរបស់លោកនឹងបង្កើនល្បឿនឆ្ពោះទៅរកការក្លាយជាមហាអំណាចយោធាជាមួយនឹងអាវុធនុយក្លេអ៊ែរ ហើយនឹងមិនច្រានចោលការប្រើប្រាស់វាទេ ប្រសិនបើសត្រូវវាយប្រហារខ្លួននោះ។
លោកគីមបានលើកឡើងពីឈ្មោះប្រធានាធិបតីកូរ៉េខាងត្បូង Yoon Suk Yeol ជាលើកទីពីរក្នុងរយៈពេលមួយសប្តាហ៍ ក្នុងការថ្កោលទោសរដ្ឋាភិបាលក្រុងសេអ៊ូលចំពោះការឃុបឃិតជាមួយរដ្ឋាភិបាលក្រុងវ៉ាស៊ីនតោន ដើម្បីធ្វើឲ្យអស្ថិរភាពក្នុងតំបន់ ដើម្បីតែចង់បញ្ជាក់ការពិតថាខ្លួនមិនមានអាវុធយុទ្ធសាស្ត្រ។
KCNA បានដកស្រង់សម្តីលោកគីមថា «លោក Yoon Suk Yeol បានធ្វើអត្ថាធិប្បាយដ៏គ្មានអត្ថន័យ និងអសុរោះអំពីទីបញ្ចប់នៃសាធារណរដ្ឋនៅក្នុងសុន្ទរកថារបស់គាត់ ហើយវាបានបង្ហាញថាគាត់បានងប់ទាំងស្រុងនឹងជំនឿមោបាំងរបស់គាត់ចំពោះកងកម្លាំងរបស់ចៅហ្វាយគាត់ គឺសហរដ្ឋអាមេរិក»។
លោកបាននិយាយនៅក្នុងសុន្ទរកថានៅឯសាកលវិទ្យាល័យការពារជាតិគីម ជុងអ៊ុន ជាកន្លែងហ្វឹកហ្វឺនសម្រាប់អ្នកឯកទេសខាងយោធាវីរជនថា «និយាយឱ្យត្រង់ទៅ យើងគ្មានចេតនាវាយប្រហារកូរ៉េខាងត្បូងទេ។ រាល់ពេលដែលខ្ញុំបញ្ជាក់ពីជំហររបស់យើងលើការប្រើប្រាស់កម្លាំងយោធា ខ្ញុំបានប្រើប្រាស់គុណសម្បត្តិ យ៉ាងច្បាស់ និងជាប់លាប់»។
«ប្រសិនបើសត្រូវព្យាយាមប្រើកម្លាំងប្រឆាំងនឹងប្រទេសរបស់យើង យោធារបស់សាធារណរដ្ឋនឹងប្រើអំណាចវាយលុកទាំងអស់ដោយមិនស្ទាក់ស្ទើរ។ នេះមិនរារាំងការប្រើអាវុធនុយក្លេអ៊ែរទេ»។ លោកបានបន្ថែមថា «ការបោះជំហានរបស់យើងឆ្ពោះទៅរកការក្លាយជាមហាអំណាចយោធា និងមហាអំណាចនុយក្លេអ៊ែរ នឹងបង្កើនល្បឿន»។
កូរ៉េខាងជើងបានបន្តកម្មវិធីអាវុធនុយក្លេអ៊ែរអស់ជាច្រើនទសវត្សរ៍ ហើយត្រូវគេជឿថាមានសារធាតុគ្រប់គ្រាន់ដើម្បីផលិតអាវុធនុយក្លេអ៊ែររាប់សិបគ្រាប់។ កូរ៉េខាងជើងបានធ្វើតេស្តបំផ្ទុះនុយក្លេអ៊ែរនៅក្រោមដីចំនួនប្រាំមួយគ្រាប់រួចមកហើយ៕(ប្រែសម្រួលដោយ លោកសំណាង)
