ភ្នំពេញ ៖ ស្រ្តីសុំទានម្នាក់និងកូនតូច២នាក់ដើរឆ្លងផ្លូវត្រូវរថយន្តមិនស្គាល់ម៉ាកមួយគ្រឿងបុកពេញទំហឹង បណ្តាលឱ្យបាត់បង់ជីវិតទាំង៣នាក់ គួរឱ្យសង្វេគរួចរថយន្តបានបន្ថែមល្បឿនរត់បាត់ ដែលហេតុការណ៍នេះកើតឡើងនៅវេលាម៉ោង៥និង០៥ នាទី ព្រឹកថ្ងៃទី៨ ខែតុលា ឆ្នាំ២០២៤ នៅលើកំណាត់ផ្លូវជាតិលេខ៤ ភូមិផ្សារកំបូល សង្កាត់-ខណ្ឌកំបូល។
តាមសម្តីរបស់បុរសម្នាក់ឈ្មោះឡេស ទូច អាយុ៣៦ឆ្នាំ មុខរបរសុំទាន បាននិយាយថា «អ្នកស្លាប់ទាំង៣នាក់ខាងលើនោះគឺជាប្រពន្ធនិងកូនរបស់គាត់ ដែលប្រពន្ធមានឈ្មោះមាជ មុំ អាយុ៤២ឆ្នាំ មុខរបរសុំទាន មានស្រុកកំណើតនៅខេត្តពោធិ៍សាត់ រីឯកូនប្រុសឈ្មោះទូច សំណាង អាយុ៦ឆ្នាំ និងកូនស្រីទូច វិច្ឆិកា អាយុ៤ឆ្នាំ»។ មុនពេលមានគ្រោះថ្នាក់គ្រួសាររបស់គាត់ទើបតែមកស្នាក់នៅក្នុងវត្តកំបូល ខណ្ឌកំបូលនេះបាន២ថ្ងៃប៉ុណ្ណោះ ។
បុរសនោះបាននិយាយទៀតថា នៅមុនពេលកើតហេតុប្រពន្ធគាត់បានចេញពីក្នុងវត្តមុនគាត់ ដោយបានពរកូនស្រីនិងដឹកដៃកូនប្រុសដើរឆ្លងផ្លូវជាតិលេខ៤ដើម្បីចេញសុំទាន ហើយក៏ស្រាប់តែជួបគ្រោះថ្នាក់ដល់ស្លាប់បែបនេះតែម្ដង។
យោងតាមកាមេរ៉ាសុវត្ថិភាពឃើញថា នៅមុនពេលកើតហេតុជនរងគ្រោះទាំង៣នាក់បាននាំគ្នាដើរឆ្លងផ្លូវ ក្នុងទិសដៅពីជើងទៅត្បូង ,លុះពេលទៅដល់កណ្ដាលផ្លូវ ស្រាប់តែមានរថយន្តធុនតូច១គ្រឿងមើលមិនច្បាស់ ដោយពុំដឹងថាម៉ាកអ្វីនោះទេ ។
រថយន្តនោះបានបើកបរធ្វើដំណើរក្នុងទិសដៅពកើតទៅលិចក្នុងល្បឿនលឿនទៅដល់បុកពេញទំហឹង បណ្ដាលឱ្យស្លាប់ទាំង៣នាក់ម្ដាយនិងកូនតែម្ដង បន្ទាប់មករថយន្តបង្កបានបើករត់គេចទៅបាត់តែម្ដង ។
ក្រោយពេលកើតហេតុនគរបាលប៉ុស្តិ៍កំបូល និងខណ្ឌកំបូលបានចុះទៅកាន់ទីនោះធ្វើការស្រាវជ្រាវតាមរយៈកាមេរ៉ាសុវត្ថិភាពដែលបំពាក់នៅតាមផ្ទះប្រជាពលរដ្ឋនៅក្បែរកន្លែងកើតហេតុ ដើម្បីតាមរករថយន្តបង្កចាត់ការតាមច្បាប់ ៕(ដោយ សុជាតិ១៣)
