អាមេរិក ៖ លោក ដូណាល់ ត្រាំ មកពីគណបក្សសាធារណរដ្ឋ បានច្រានចោលការឈរឈ្មោះម្តងទៀតនៅក្នុងការបោះឆ្នោតប្រធានាធិបតីអាមេរិកឆ្នាំ ២០២៨ ប្រសិនបើគាត់ចាញ់នៅក្នុងកាបោះឆ្នោតខែវិច្ឆិកាខាងមុខនេះ ។ នេះបើយោងតាមបទសម្ភាសន៍ដែលបានចាក់ផ្សាយកាលពីថ្ងៃអាទិត្យ ទី២២ កញ្ញាឆ្នាំ២០២៤ ។
ឆ្លើយតបទៅនឹងសំណួរថាតើគាត់នឹងឈរឈ្មោះម្តងទៀតទេ ប្រសិនបើគាត់ចាញ់នោះ អតីតប្រធានាធិបតីអាយុ ៧៨ឆ្នាំរូបនេះបានប្រាប់កម្មវិធីព័ត៌មានរបស់សហរដ្ឋអាមេរិក Full Measure ថា «ទេ ខ្ញុំមិនឈរឈ្មោះទេ។ ខ្ញុំគិតថាវានឹងចប់ហើយ។ ខ្ញុំមិនឃើញរឿងនោះកើតឡើងទាល់តែសោះ»។
ទោះយ៉ាងណាក៏ដោយ មហាសេដ្ឋីរូបនេះបាននិយាយថា គាត់សង្ឃឹមថានឹង «ជោគជ័យ»នៅក្នុងការបោះឆ្នោតនៅថ្ងៃទី ៥ ខែវិច្ឆិកាឆ្នាំ២០២៤ខាងមុខ។
បច្ចុប្បន្នលោកត្រាំកំពុងប្រជែងជាមួយបេក្ខនារីមកពីគណបក្សប្រជាធិបតេយ្យគឺអនុប្រធានាធិបតី កាម៉ាឡា ហារីស រួមទាំងនៅក្នុងរដ្ឋសមរភូមិសំខាន់ៗ ដែលជារឿយៗសម្រេចឈ្នះចាញ់ក្នុងការបោះឆ្នោតប្រកៀកប្រកិតរបស់អាមេរិក។
គណបក្សប្រជាធិបតេយ្យបានឃើញមានការគាំទ្រឡើងវិញបន្ទាប់ពីការដកលោកប្រធានាធិបតី ចូ បៃដិន ពីបេក្ខភាពរបស់ខ្លួនកាលពីខែកក្កដា ក្រោយពីមានការជជែកដេញដោលដ៏មហន្តរាយទល់នឹងលោកត្រាំ៕(ប្រែសម្រួលដោយ លោកសំណាង)
