បរទេស ៖ អ៊ីស្រាអែលបានសម្លាប់មេបញ្ជាការកំពូលក្រុមហេសប៊ូឡានិងឥស្សរជនជាន់ខ្ពស់ផ្សេងទៀតនៅក្នុងចលនាលីបង់នៅក្នុងការវាយប្រហារតាមអាកាសលើទីក្រុងបៃរូតកាលពីថ្ងៃសុក្រ ទី ២០ ខែកញ្ញាឆ្នាំ២០២៤ ដោយបានប្តេជ្ញាថានឹងបន្តជំរុញយុទ្ធនាការយោធាថ្មីរហូតដល់ពួកគេអាចធានាបាននូវតំបន់ជុំវិញព្រំដែនលីបង់។
ក្រុមហេសប៊ូឡាបានបញ្ជាក់កាលពីព្រឹកព្រលឹមថ្ងៃសៅរ៍នេះថា មេបញ្ជាការយោធាកំពូលរបស់ខ្លួនឈ្មោះ Ibrahim Aqil ត្រូវបានសម្លាប់ ដោយហៅគាត់ថា «មេដឹកនាំកំពូលម្នាក់»ដោយមិនផ្តល់ព័ត៌មានលម្អិតបន្ថែមអំពីការសម្លាប់របស់គាត់ទេ។
យោធាអ៊ីស្រាអែល និងប្រភពសន្តិសុខនៅក្នុងប្រទេសលីបង់បាននិយាយថា Ibrahim Aqil ត្រូវបានសម្លាប់នៅក្នុងការវាយប្រហាររបស់អ៊ីស្រាអែលលើទីក្រុងបៃរូត កាលពីព្រឹកថ្ងៃសុក្រ រួមជាមួយសមាជិកជាន់ខ្ពស់ផ្សេងទៀតនៃអង្គភាពវរជនហេសប៊ូឡា ក្នុងការវាយប្រហារតាមអាកាស ដែលរឹតបង្កើនជម្លោះពេលមួយឆ្នាំរវាងអ៊ីស្រាអែល និងក្រុមដែលគាំទ្រដោយអ៊ីរ៉ង់នេះ។
លោក Aqil ដែលអាមេរិកតាមចាប់ខ្លួនទាក់ទងនឹងបំផ្ទុះគ្រាប់បែកក្នុងឆ្នាំ ១៩៨៣ លើស្ថានទូតអាមេរិកក្នុងទីក្រុងបៃរូតបានដឹកនាំកម្លាំងវរជន Radwan របស់ក្រុមហេសប៊ូឡា។
ក្រសួងសុខាភិបាលនៃប្រទេសលីបង់បាននិយាយថា យ៉ាងហោចណាស់មនុស្ស ១៤ នាក់បានស្លាប់ ហើយចំនួនអ្នកស្លាប់ត្រូវបានរំពឹងថានឹងកើនឡើង ខណៈដែលក្រុមជួយសង្គ្រោះបានធ្វើការពេញមួយយប់។ គេមិនដឹងភ្លាមៗថាតើចំនួនអ្នកស្លាប់នោះរួមបញ្ចូលទាំងលោក Aqil និងមេបញ្ជាការជាន់ខ្ពស់របស់ក្រុមហេសប៊ូឡាផ្សេងទៀតឬអត់ទេ។ មុននេះ យោធាបាននិយាយថា មនុស្សយ៉ាងហោចណាស់ ៦៦នាក់បានរងរបួស ក្នុងនោះ ៩នាក់ស្ថិតក្នុងស្ថានភាពធ្ងន់ធ្ងរ។
ប្រភពសន្តិសុខទីពីរបាននិយាយថា ការវាយប្រហារនេះត្រូវបានធ្វើឡើងជាមួយនឹងកាំជ្រួចជាច្រើនគ្រាប់ ដែលបានបាញ់ស្រោចទៅលើការបើកសម្ភោធកន្លែងចតឡានរបស់អគារមួយ។ ការផ្ទុះបានហែកចូលទៅជាន់ទាបៗនៃអគារខណៈដែល Aqil បានជួបមេបញ្ជាការកំពូលផ្សេងទៀតនៅខាងក្នុង។
សាក្សីបានរាយការណ៍ថាបានឮសំឡេងផ្លុំកញ្ចែយ៉ាងខ្លាំង និងការផ្ទុះជាបន្តបន្ទាប់នៅពេលវាយប្រហារ។
នៅក្នុងសេចក្តីថ្លែងការណ៍ខ្លីមួយ ដែលធ្វើឡើងដោយប្រព័ន្ធផ្សព្វផ្សាយរបស់អ៊ីស្រាអែល នាយករដ្ឋមន្ត្រី Benjamin Netanyahu បាននិយាយថា គោលដៅរបស់អ៊ីស្រាអែលគឺច្បាស់លាស់ ហើយសកម្មភាពរបស់ខ្លួនគឺនិយាយដោយខ្លួនឯង។
រដ្ឋមន្ត្រីក្រសួងការពារជាតិ Yoav Gallant ដែលបាននិយាយនៅសប្តាហ៍នេះថា អ៊ីស្រាអែលនឹងចាប់ផ្តើមដំណាក់កាលថ្មីនៃសង្រ្គាមនៅព្រំដែនភាគខាងជើងនោះ បានបង្ហោះសារនៅលើ X ថា «លំដាប់នៃសកម្មភាពក្នុងដំណាក់កាលថ្មីនេះនឹងបន្តរហូតដល់គោលដៅរបស់យើងត្រូវបានសម្រេច នោះគឺ ការវិលត្រឡប់ប្រកបដោយសុវត្ថិភាពនៃប្រជាជននៅភាគខាងជើងទៅផ្ទះរបស់ពួកគេវិញ»៕(ប្រែសម្រួលដោយ លោកសំណាង)
