ភ្នំពេញ៖ ក្មេងស្រី២នាក់បានជិះម៉ូតូឌុបគ្នាទៅផ្សារទំនើប ត្រូវរថយន្តមួយគ្រឿងបើកបរ ក្នុងល្បឿនលឿនមក បុកប៉ើងជាច្រើនម៉ែត្របណ្តោយឱ្យបាត់បង់ជីវិតទាំង២នាក់ ហើយរថយន្តបង្កបានបើកគេចបាត់។
ហេតុការណ៍គ្រោះថ្នាក់ចរាចរណ៍ខាងលើ បង្កការភ្ញាក់ផ្អើលកាលពីវេលាម៉ោង៧ និង៣០នាទីយប់ ថ្ងៃទី០៩ ខែកញ្ញាឆ្នាំ២០២៤ មុខផ្សារទំនើបឡាក់គី ស្ថិតនៅលើផ្លូវលេខ១៩៨៦ សង្កាត់ភ្នំពេញថ្មី ខណ្ឌសែនសុខ។
សាច់ញាតិបានឱ្យដឹងថា សពក្មេងស្រី ទី១-ឈ្មោះមិត្ត ជូលី អាយុ១១ឆ្នាំ និងសពក្មេងស្រីទី២-ឈ្មោះមិត្ត សុផេងអាយុ៩ឆ្នាំ ។ មុនពេលកើត ក្មេងស្រីទាំង២នាក់ បានសុំអ្នកផ្ទះ មករកទិញអីនៅផ្សារទំនើបឡាក់គី ដែលនៅក្បែរកន្លែងកើតហេតុ។
ប្រភពពីកន្លែងកើតហេតុបានឱ្យដឹងថា ដំបូងគេឃើញក្មេងស្រីរងគ្រោះ២នាក់ ជិះម៉ូតូម៉ាកZoomerX ពាក់ស្លាកលេខភ្នំពេញ1FS- 7326 ជិះឌុបគ្នាតាមបណ្តោយផ្លូវ១៩៨៦ ក្នុងទិសដៅពីលិចទៅកើត ។
ខណៈពេលជិះមកដល់ចំណុចកើតហេតុ មុខផ្សារទំនើបឡាក់គីផ្សារ ស្រាប់តែមានរថយន្តពណ៌សមួយគ្រឿងមិនម៉ាកមិនចាំស្លាកលេខ ធ្វើដំណើរក្នុងទិសដៅបញ្រ្ចាស់គ្នាពីកើតទៅលិចក្នុងល្បឿនលឿន បានរេជ្រុលចង្កូតបុកម៉ូតូជនរងគ្រោះពេញទំហឹងប៉ើងទៅមុខជាច្រើនម៉ែត្របណ្តាលឲ្យក្មេងស្រីទាំង២នាក់ត្រូវជាបងប្អូនបង្កើត ស្លាប់នៅកន្លែងហើយរថយន្តបង្កបានបន្ថែមល្បឿនបើករត់គេចបាត់។
បន្ទាប់ពីកើតហេតុសមត្ថកិច្ចមូលដ្ឋានសហការជាមួយនគរបាលជំនាញចុះមកដល់វាស់វែងយកម៉ូតូជនរងគ្រោះទៅរក្សាទុក រួចធ្វើកំណត់ហេតុប្រគល់សពឲ្យទៅក្រុមគ្រួសារយកទៅធ្វើបុត្រតាមប្រពៃណី៕ (ដោយ សំណាង)
