ចិន ៖ ព្យុះទីហ្វុងទី១១ឈ្មោះថា Yagi នៅឆ្នាំនេះ បានបោកបក់នៅលើទីក្រុង Wenchang ខេត្ត Hainan និងស្រុកXuwen ខេត្ត Guangdong ប្រទេសចិនកាលពីថ្ងៃទី ៦ ខែកញ្ញាឆ្នាំ២០២៤ ដែលបណ្តាលឱ្យរងគ្រោះមហន្តរាយយ៉ាងធ្ងន់ធ្ងរ អ្នកប្រើប្រាស់ជាច្រើនបានដាច់អគ្គិសនីនិងសេវាទូរគមនាគមន៍ ហើយផ្ទះមួយចំនួនត្រូវរងការខូចខាតនិងដួលរលំ។
គិតរហូតដល់ម៉ោង ១២ ថ្ងៃទី៧ ខែកញ្ញា ព្យុះនេះបានបណ្តាលឱ្យប្រជាជនជាង ១២២ ម៉ឺននាក់រងគ្រោះក្នុងកម្រិតផ្សេងៗគ្នានៅក្នុងខេត្ត Hainan, Guangdong និង Guangxi ក្នុងនោះមានមនុស្ស ៣ នាក់បានបាត់បង់ជីវិត និង ៩៥ នាក់ផ្សេងទៀតរងរបួស។
បន្ទាប់ពីកើតគ្រោះមហន្តរាយ លោក Xi Jinping អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តចិន ប្រធានរដ្ឋចិន និងជាប្រធានគណៈកម្មាធិការយោធាមជ្ឈិមចិនបានយកចិត្តទុកដាក់ខ្ពស់ និងផ្តល់អនុសាសន៍ណែនាំសំខាន់ថាត្រូវប្រមូលកម្លាំងដើម្បីជួយសង្គ្រោះគ្រោះមហន្តរាយជាបន្ទាន់ និងធ្វើការងារជម្លៀសជនរងគ្រោះឱ្យបានសមរម្យបង្ការកុំឱ្យកើតឡើងគ្រោះមហន្តរាយបន្ទាប់បន្សំ ខិតខំប្រឹងប្រែងដើម្បីកាត់បន្ថយចំនួនមនុស្សស្លាប់បាត់បង់ជីវិតនិងរងរបួស ។
ត្រូវជួសជុលឡើងវិញនូវហេដ្ឋារចនាសម្ព័ន្ធក្នុងវិស័យគមនាគមន៍អគ្គិសនីនិងទូរគមនាគមន៍ជាដើម ធ្វើការងារស្តាឡើងវិញយ៉ាងសកម្មបន្ទាប់ពីគ្រោះមហន្តរាយ ស្ដារផលិតកម្មនិងធ្វើឱ្យប្រជាជនមានជីវភាពជាប្រក្រតីឡើងវិញក្នុងពេលឆាប់ៗ ដើម្បីធានាជាក់លាក់នូវសុវត្ថិភាពអាយុជីវិតនិងទ្រព្យសម្បត្តិរបស់ប្រជាជន។
អគ្គបញ្ជាការដ្ឋានជាតិបង្ការទឹកជំនន់និងប្រយុទ្ធប្រឆាំងនឹងគ្រោះរាំងស្ងួតរបស់ចិនបានចាត់បញ្ជូនក្រុមការងារទៅកាន់ខេត្ត Hainan និង Guangdong ដើម្បីណែនាំការងារជួយសង្គ្រោះ ។ ពេលបច្ចុប្បន្ន អគ្គិសនីនិងសេវាទូរគមនាគមន៍មួយចំនួនបានដំណើរការឡើងវិញ ហើយគ្រប់ការងារជួយសង្គ្រោះកំពុងដំណើរការវិវឌ្ឍទៅមុខ៕(ដោយ ប៉ូច គឹមសុខ)
