បរទេស ៖ យ៉ាងហោចណាស់មនុស្ស ៥០នាក់បានបាត់បង់ជីវិត និង ២៧១នាក់បានរងរបួស នៅពេលដែលរុស្ស៊ីបានវាយប្រហារវិទ្យាស្ថានយោធាមួយនៅក្នុងទីក្រុង Poltava ភាគកណ្តាលរបស់អ៊ុយក្រែនជាមួយនឹងមីស៊ីលផ្លោងចំនួន២ គ្រាប់កាលពីថ្ងៃទី ៣ ខែកញ្ញា ឆ្នាំ២០២៤ដែលជាការវាយប្រហារសម្លាប់មនុស្សច្រើនបំផុតក្នុងសង្រ្គាមក្នុងឆ្នាំនេះ។
រូបថតដែលបានបង្ហោះនៅលើបណ្តាញសង្គមបានបង្ហាញសាកសពបុរសវ័យក្មេងជាច្រើននាក់នៅលើដីប្រឡាក់ដោយធូលី និងកម្ទេចកម្ទី ជាមួយនឹងផ្នែកដែលរងការខូចខាតយ៉ាងធ្ងន់ធ្ងរនៃអគារដ៏ធំនៅពីក្រោយពួកគេ។ ទីភ្នាក់ងារសារព័ត៌មានរ៉យទ័រមិនអាចផ្ទៀងផ្ទាត់រូបភាពទាំងនោះបានភ្លាមៗទេ។
ប្រធានាធិបតី វ៉ូឡូឌីមៀ ហ្សេលេនស្គី បាននិយាយនៅលើកម្មវិធីផ្ញើសារ Telegram ថា «ពួករុស្ស៊ីពិតជានឹងត្រូវចាប់ឱ្យទទួលខុសត្រូវចំពោះការវាយប្រហារនេះ»។
លោកបានបញ្ជាឱ្យមានការស៊ើបអង្កេតភ្លាមៗ ដោយនិយាយថា«ការវាយប្រហារបានបំផ្លាញអគារវិទ្យាស្ថានទំនាក់ទំនងយោធា»។
នៅក្នុងសុន្ទរកថាជាវីដេអូពេលយប់របស់គាត់ដែលបានចែកចាយនៅពេលល្ងាច លោកហ្សេលេនស្គីបានដាក់ចំនួនអ្នកស្លាប់ ៥១ នាក់។
លោកបានថ្លែងថា «គេបានដឹងថាមានមនុស្សនៅក្រោមគំនរបាក់បែកនៃអគារដែលត្រូវបានបំផ្លាញនោះ។ អ្វីៗកំពុងត្រូវបានធ្វើឡើងដើម្បីសង្គ្រោះជីវិតឱ្យបានច្រើនតាមដែលអាចធ្វើទៅបាន»។
សេវាសង្គ្រោះបន្ទាន់បានដាក់ចំនួនអ្នកស្លាប់ ៥០ នាក់។ អភិបាលតំបន់ Poltava លោក Filip Pronin បាននិយាយថា«មនុស្ស ១៥ នាក់ប្រហែលកំពុងស្ថិតនៅក្រោមគំនរបាក់បែក»៕(ប្រែសម្រួលដោយ លោកសំណាង)
