ថៃ ៖ នាយករដ្ឋមន្ត្រីថ្មីរបស់ប្រទេសថៃ ផែតុងតាន ស៊ីណាវ៉ាត់ បានប្តេជ្ញាចិត្តលើកកម្ពស់ជីវភាពរបស់ប្រជាជន ហើយនិយាយថា លោកស្រីនឹងទទួលដំបូន្មានពីឪពុកជាអតីតនាយករដ្ឋមន្ត្រី ថាក់ស៊ីន ស៊ីណាវ៉ាត់ ។
លោកស្រីផែតុងតានបាននិយាយនៅក្នុងសន្និសីទសារព័ត៌មានដំបូង បន្ទាប់ពីត្រូវបានតែងតាំងនៅព្រឹកថ្ងៃទី១៨ខែសីហាឆ្នាំ២០២៤ថា «ប៉ុន្តែមិនមែនគ្រប់ពេលទេ ព្រោះវាមិនអាចទៅរួច។ ខ្ញុំជាបុគ្គលខ្លួនខ្ញុំ ហើយ… ខ្ញុំមានគោលដៅរបស់ខ្ញុំដែលខ្ញុំចង់សម្រេចបានសម្រាប់អនាគត»។
លោកស្រីផែតុងតានអាយុ ៣៧ ឆ្នាំគឺជាមេដឹកនាំគណបក្សភឿថៃ ដែលកំពុងកាន់អំណាច និងជាកូនស្រីពៅរបស់មហាសេដ្ឋីដ៏មានអំណាច ដែលបានដឹកនាំប្រទេសមួយរយៈពេលពីឆ្នាំ២០០១។
លោកស្រីផែតុងតានបាននិយាយថា ខណៈមិនមានគម្រោងសម្រាប់ឪពុកក្នុងការកាន់តំណែងផ្លូវការណាមួយនៅក្នុងរដ្ឋាភិបាលនោះ លោកស្រីនឹងសុំប្រឹក្សាយោបល់ពីគាត់ ក៏ដូចជាក្រុមគ្រួសាររបស់លោកស្រី និងអ្នកដែលលោកស្រីគោរព។
លោកស្រីបានបន្តថា «ចក្ខុវិស័យរបស់គាត់បានរួមចំណែកក្នុងការអភិវឌ្ឍប្រទេសអស់រយៈពេលជាង ១០ ឆ្នាំមកហើយ… ដូច្នេះហើយវាជារឿងជៀសមិនរួចទេ ដែលនាងខ្ញុំត្រូវសុំយោបល់ពីគាត់»។
លោកស្រីផែតុងតានគឺជាមនុស្សវ័យក្មេងបំផុតដែលបានក្លាយជានាយករដ្ឋមន្ត្រីថៃ។ ម្តាយកូនពីររូបនេះក៏ជានាយករដ្ឋមន្ត្រីស្រីទីពីររបស់ប្រទេស និងជាត្រកូលស៊ីណាវ៉ាត់ទីបីដែលឡើងកាន់តំណែងជានាយករដ្ឋមន្ត្រីបន្ទាប់ពីម្តាយមីងរបស់លោកស្រី គឺយីងឡាក់ និងឪពុក ថាក់ស៊ីន ដែលបាននិរទេសខ្លួនបន្ទាប់ពីរដ្ឋប្រហារយោធា។
លោកស្រីសង្ឃឹមថាការដឹកនាំរបស់លោកស្រីនឹងមិនជួបជោគវាសនាដូចគ្នាទៅចុះ។ លោកស្រីបានឆ្លើយនឹងសំណួរមួយពីកាសែត The Straits Times យ៉ាងដូច្នេះថា «ខ្ញុំរំពឹងថារដ្ឋាភិបាលរបស់ខ្ញុំនឹងខ្លាំងបំផុត។ ជាការពិតណាស់ ខ្ញុំត្រូវតែសម្លឹងមើលទៅភាពភ្លឺត្រចះត្រចង់»។
លោកស្រីបានបន្ថែមថា «ខណៈខ្ញុំមិនមានគម្រោងទទួលយកតួនាទីនេះពីដំបូង ខ្ញុំចង់ធានាដល់អ្នករាល់គ្នាថាខ្ញុំបានត្រៀមខ្លួនយ៉ាងពេញលេញ និងមានការតាំងចិត្តខ្ពស់។យើងត្រូវមើលគោលដៅ។ ប្រសិនបើយើងអង្គុយតែខ្វល់ខ្វាយពីអ្វីៗគ្រប់យ៉ាង នោះយើងនឹងមិនអាចសម្រេចបានគោលដៅរបស់យើងឡើយ»។
លោកស្រីផែតុងតានបាននិយាយថា ការផ្តោតសំខាន់របស់លោកស្រីគឺគោលនយោបាយសំខាន់ៗ ដូចជាកំណែទម្រង់សេដ្ឋកិច្ច ការកែលម្អការថែទាំសុខភាព និងការលើកកម្ពស់ប្រទេសថៃនៅលើឆាកពិភពលោក ដោយមិនបាននិយាយអំពីការចែកលុយចំនួន ១០.០០០ បាតសម្រាប់មនុស្សម្នាក់ដែលគណបក្សភឿថៃបានសន្យាក្នុងអំឡុងយុទ្ធនាការបោះឆ្នោតឆ្នាំ ២០២៣ នោះទេ៕(ប្រែសម្រួលដោយ លោកសំណាង)
