រេស៊ីល ៖ ក្រុមហ៊ុនអាកាសចរណ៍ Voepass បាននិយាយថា យន្តហោះ ដែលដឹកអ្នកដំណើរ ៥៧ នាក់ និងសមាជិកអាកាសយានិក ៤ នាក់បានធ្លាក់កាលពីថ្ងៃសុក្រ ទី៩ សីហា ឆ្នាំ២០២៤ នៅក្នុងរដ្ឋ Sao Paulo របស់ប្រទេសប្រេស៊ីលដោយសម្លាប់មនុស្សគ្រប់គ្នានៅលើយន្តហោះ។
យន្តហោះ ATR 72-500 ដំណើរការដោយក្រុមហ៊ុនអាកាសចរណ៍ Voepass កំពុងធ្វើដំណើរពីទីក្រុង Cascavel ភាគខាងត្បូងរដ្ឋ Parana ទៅកាន់អាកាសយានដ្ឋានអន្តរជាតិ Guarulhos របស់រដ្ឋ Sao Paulo នៅពេលដែលវាធ្លាក់ក្នុងទីក្រុង Vinhedo ។
ដំបូងឡើយ ក្រុមហ៊ុន Voepass បាននិយាយថា ជើងហោះហើរលេខ 2283 បានដឹកអ្នកដំណើរចំនួន ៥៨ នាក់ ប៉ុន្តែសេចក្តីថ្លែងការណ៍នៅលើវេបសាយរបស់ក្រុមហ៊ុនអាកាសចរណ៍នេះក្រោយមកបានកែប្រែតួលេខនេះទៅជា ៥៧នាក់វិញ។
រូបភាពដែលផ្សាយតាមប្រព័ន្ធផ្សព្វផ្សាយក្នុងស្រុក បានបង្ហាញយន្តហោះដ៏ធំមួយកំពុងវិលខ្ញាល់ ខណៈដែលវាធ្លាក់ចុះដាំក្បាលចុះ ហើយរូបភាពផ្សេងទៀតបានបង្ហាញពីផ្សែងដ៏ច្រើនដែលហុយចេញពីកន្លែងធ្លាក់ក្នុងកន្លែងដែលហាក់ដូចជាតំបន់លំនៅដ្ឋាន។
អាជ្ញាធរទីក្រុងនៅទីក្រុង Valinhos ដែលចូលរួមក្នុងប្រតិបត្តិការជួយសង្គ្រោះ និងសង្គ្រោះនៅតំបន់ Vinhedo ក្បែរនោះបាននិយាយនៅក្នុងអ៊ីមែលមួយផ្ញើទៅ AFP ថា «មិនមានអ្នកនៅរស់ទេ»។
ទីក្រុង Vinhedo ដែលមានប្រជាជនប្រហែល ៧៦.០០០ នាក់ គឺស្ថិតនៅចម្ងាយប្រហែល ៨០ គីឡូម៉ែត្រភាគពាយព្យនៃទីក្រុង Sao Paulo ។
អភិបាលរដ្ឋ Sao Paulo លោក Tarcisio de Freitas បានប្រាប់អ្នកយកព័ត៌មាននៅកន្លែងកើតហេតុថា ការទាញយកសាកសពជនរងគ្រោះសម្រាប់ «ការកំណត់អត្តសញ្ញាណ»បានចាប់ផ្តើម«ហើយនឹងបន្តពេញមួយយប់»។ចំណែកប្រធាន Luiz Inacio Lula da Silva បានប្រកាសកាន់ទុក្ខបីថ្ងៃ។
ក្រុមហ៊ុន Voepass បាននិយាយថា ខ្លួនកំពុងសហការជាមួយអាជ្ញាធរដើម្បី «កំណត់ពីមូលហេតុនៃគ្រោះថ្នាក់នេះ»ខណៈផ្តល់ជំនួយពេញលេញដល់ក្រុមគ្រួសារជនរងគ្រោះនៅលើជើងហោះហើរលេខ 2283 ?៕(ប្រែសម្រួលដោយ លោកសំណាង)
