សហរដ្ឋអាមេរិក ៖ ប្រធានាធិបតីអាមេរិកលោក ចូ បៃដិន បានដកខ្លួនចេញពីការប្រជែងបោះឆ្នោតដ៏ស្រពេចស្រពិលរបស់គាត់កាលពីថ្ងៃអាទិត្យ ទី២១ ខែកក្កដា ឆ្នាំ២០២៤ ចំពេលមានការជំទាស់កាន់តែខ្លាំងនៅក្នុងគណបក្សប្រជាធិបតេយ្យផ្ទាល់របស់គាត់ ហើយបានគាំទ្រអនុប្រធានាធិបតី កាម៉ាឡា ហារីស (Kamala Harris) ឱ្យជំនួសគាត់ជាបេក្ខជនរបស់គណបក្សទល់នឹងលោក ដូណាល់ ត្រាំ មកពីគណបក្សសាធារណរដ្ឋ។
លោកបៃដិនអាយុ ៨១ ឆ្នាំបាននិយាយនៅក្នុងការប្រកាសនៅលើ X ថា គាត់នឹងបន្តតួនាទីរបស់គាត់ជាប្រធានាធិបតីនិងជាអគ្គមេបញ្ជាការរហូតដល់អាណត្តិរបស់គាត់នឹងបញ្ចប់នៅខែមករាឆ្នាំ ២០២៥ ហើយនឹងថ្លែងទៅកាន់ប្រទេសជាតិក្នុងសប្តាហ៍នេះ។ គាត់មិនត្រូវបានឃើញជាសាធារណៈ ចាប់តាំងពីបានតេស្តវិជ្ជមានកូវីដ១៩ កាលពីសប្តាហ៍មុន ហើយគាត់កំពុងធ្វើចត្តាឡីស័កនៅផ្ទះរបស់គាត់នៅទីក្រុង Rehoboth Beach រដ្ឋ Delaware ។
លោកបៃដិនបាននិយាយថា «ខណៈវាជាចេតនារបស់ខ្ញុំក្នុងការស្វែងរកការបោះឆ្នោតឡើងវិញ ខ្ញុំជឿថាវាជាផលប្រយោជន៍ល្អបំផុតរបស់គណបក្ស និងប្រទេសរបស់ខ្ញុំសម្រាប់ខ្ញុំដកខ្លួនចេញ ហើយផ្តោតតែលើការបំពេញភារកិច្ចរបស់ខ្ញុំជាប្រធានាធិបតីសម្រាប់រយៈពេលសេសសល់នៃអាណត្តិរបស់ខ្ញុំ»។
ប្រធានគណៈកម្មាធិការជាតិប្រជាធិបតេយ្យ លោក Jaime Harrison បាននិយាយថា ប្រជាជនអាមេរិកនឹងឮពីគណបក្សអំពីជំហានបន្ទាប់ និងផ្លូវឆ្ពោះទៅមុខសម្រាប់ដំណើរការតែងតាំងបេក្ខជននាពេលឆាប់ៗ។ វាជាលើកដំបូងក្នុងរយៈពេលជាងកន្លះសតវត្សរ៍ដែលប្រធានាធិបតីអាមេរិកក្នុងតំណែងបោះបង់ការតែងតាំងពីគណបក្សរបស់គាត់។
ប្រសិនបើត្រូវបានតែងតាំងជាផ្លូវការ លោកស្រីហារីស អាយុ ៥៩ ឆ្នាំ នឹងក្លាយជាស្ត្រីស្បែកខ្មៅដំបូងគេដែលឈរឈ្មោះដើម្បីដឹកនាំគណបក្សធំមួយនៅក្នុងប្រវត្តិសាស្ត្រអាមេរិក។ ជាអតីតអគ្គរដ្ឋអាជ្ញានៃរដ្ឋកាលីហ្វ័រញ៉ា និងជាអតីតព្រឹទ្ធសមាជិកអាមេរិក លោកស្រីបានឈរឈ្មោះជាប្រធានាធិបតីដោយមិនបានជោគជ័យទល់នឹងលោកបៃដិនក្នុងឆ្នាំ ២០២០។
លោកស្រីហារីសបាននិយាយនៅក្នុងសេចក្តីថ្លែងការណ៍មួយថា «បំណងរបស់ខ្ញុំគឺចង់ទទួលបានការតែងតាំងនេះ។ ខ្ញុំនឹងធ្វើអ្វីគ្រប់យ៉ាងនៅក្នុងអំណាចរបស់ខ្ញុំដើម្បីបង្រួបបង្រួមគណបក្សប្រជាធិបតេយ្យ និងបង្រួបបង្រួមជាតិរបស់យើងដើម្បីផ្តួល ដូណាល់ ត្រាំ»៕(ប្រែសម្រួលដោយ លោកសំណាង)
