បន្ទាយមានជ័យ ៖ កម្លាំងនគរបាលស្រុកម៉ាឡៃឃាត់ខ្លួនជនសង្ស័យ៤នាក់ ពាក់ព័ន្ធករណីជួញដូរនិងប្រើប្រាស់សារធាតុញៀនខុសច្បាប់ នៅវេលាម៉ោង០៥និង៤០នាទីល្ងាច ថ្ងៃអាទិត្យ ទី២២ ខែតុលា ឆ្នាំ២០២៣ ក្នុងភូមិសាស្រ្តភូមិកោះស្នួល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ។
លោកវរសេនីយ៍ឯក បេន សំអាត អធិការនគរបាលស្រុកម៉ាឡៃ បានឲ្យដឹងថា នៅវេលាម៉ោង០៥និង៤០នាទីល្ងាចថ្ងៃទី២២ ខែតុលាឆ្នាំ២០២៣ កម្លាំងផ្នែកប្រឆាំងគ្រឿងញៀន បានសហការជាមួយកម្លាំងប៉ុស្តិ៍នគរបាលរដ្ឋបាលទួលពង្រ ចុះល្បាតក្នុងភូមិសាស្រ្តភូមិកោះស្នួល ឃុំទួលពង្រ ស្រុកម៉ាឡៃ បានប្រទះឃើញមុខសញ្ញាសង្ស័យប្រើប្រាស់ម្នាក់ឈ្មោះ ឡេង សុខហេង ភេទប្រុស អាយុ២០ឆ្នាំ រស់នៅភូមិកោះស្នួល ឃុំទួលពង្រ ស្រុកម៉ាឡៃ ក៏បានធ្វើការឃាត់សួរនាំនិងឆែកឆេររកឃើញម្សៅក្រាមសថ្លាសង្ស័យសារធាតុញៀនចំនួន០២កូនថង់តូច ។
ក្រោយពីឃាត់ខ្លួននិងសាកសួរចម្លើយ ឈ្មោះ ឡេង សុខហេង បានសារភាពថា «ថ្នាំដែលខ្លួនបានទិញពីឈ្មោះ សៃភាព ភេទប្រុស អាយុ ៤០ឆ្នាំ រស់នៅភូមិខ្លាងាប់ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ គឺសម្រាប់ជក់ធ្វើការក្នុងតម្លៃ២ម៉ឺនរៀល »។
បន្ទាប់មក នៅថ្ងៃខែឆ្នាំដដែល វេលាម៉ោង០៦ និង២០នាទីល្ងាច កម្លាំងបានទៅឃាត់ខ្លួនមុខសញ្ញាជួញដូរឈ្មោះ សៃភាព ដកហូតវត្ថុតាងម្សៅក្រាមពណ៌សថ្លាសង្ស័យសារធាតុញៀនចំនួន០៥កូនថង់តូច និងឃាត់ខ្លួនជនសង្ស័យប្រើប្រាស់គ្រឿងញៀន ២នាក់ទៀត រួមមាន១-ឈ្មោះ អោក ហេង ភេទប្រុស អាយុ២៣ឆ្នាំ រស់នៅភូមិខ្លាងាប់ ឃុំទួលពង្រ ស្រុកម៉ាឡៃនិង២-ឈ្មោះ សាន ស៊ីវន ភេទប្រុស អាយុ ២០ឆ្នាំ រស់នៅភូមិកោះស្នួល ឃុំទួលពង្រ ស្រុកម៉ាឡៃ។ ការនេះឃាត់ខ្លួនជនសង្ស័យទាំង០៤នាក់និងដកហូតវត្ថុតាងសង្ស័យសារធាតុញៀនម្សៅក្រាមពណ៌សថ្លាសរុបចំនួ ន០៧កូនថង់តូច។
បច្ចប្បន្នជនសង្ស័យនិងវត្ថុតាងកម្លាំងនគរបាលជំនាញអធិការនគរបាលស្រុកម៉ាឡៃបានកសាងសំណុំរឿងតាមនីតិវិធីបញ្ជូនមកស្នងការដ្ឋាននគរបាលខេត្តបន្ទាយមានជ័យចាត់ការបន្ត ៕(ដោយ ប៉ូច គឹមសុខ)
