ភ្នំពេញ ៖ អ្នកសារព័ត៌មាន៥រូប បានទទួលជ័យលាភី ការប្រកួតប្រជែងរូបថតប្រចាំឆ្នាំ២០២៣ លើប្រធានបទ «សម្រស់សហគមន៍យើង» ពីក្លិបអ្នកកាសែតកម្ពុជា (ក.អ.ក)កាលពីព្រឹកថ្ងៃទី១៩ខែតុលាឆ្នាំ២០២៣ ដែលប្រារព្ធធ្វើឡើងនាសាកលវិទ្យាល័យអាមេរិកាំងភ្នំពេញ នៅរាជធានីភ្នំពេញ ។
លោកពុយ គា ប្រធានក្លិបអ្នកកាសែតកម្ពុជា បានឱ្យដឹងថា ចាប់ពីថ្ងៃទី៧ ខែសីហា ឆ្នាំ២០២៣ ក្លិបអ្នកកាសែតកម្ពុជា (ក.អ.ក) ដោយមានកិច្ចសហការពីក្រុមហ៊ុន ស៊ី ភី អល (ខេមបូឌា) ឯ.ក (CP ALL (Cambodia) Co., Ltd.) និងស្ថាប័នរដ្ឋចំនួន៣រួមមាន៖ ក្រសួងប្រៃសណីយ៍ និងទូរគមនាគមន៍, ក្រសួងរៀបចំដែនដី នគរូបនីយកម្ម និងសំណង់ និង ក្រសួងទេសចរណ៍ បានប្រកាសការប្រកួតប្រជែងរូបថតប្រចាំឆ្នាំ២០២៣ លើប្រធានបទ «សម្រស់សហគមន៍យើង» នៅក្នុងយុគសម័យឌីជីថល ដើម្បីផ្តល់ឱកាសដល់អ្នកសារព័ត៌មាន និងអ្នកថតរូបគ្រប់ទម្រង់នៅកម្ពុជាបានបញ្ចេញស្នាដៃរូបថតផ្ទាល់ខ្លួនដណ្តើមពានរង្វាន់រហូត៣លានរៀលសម្រាប់ជ័យលាភីលេខ១ និងពានជើងឯក។
លោកពុយ គាបន្តថា គិតមកដល់ថ្ងៃបិទការទទួលរូបថតសម្រាប់ការប្រកួតប្រជែង ក.អ.ក ទទួលបានស្នាដៃរូបថតពីបេក្ខជនចំនួន២៩រូប (៨៧សន្លឹក) ដែលមកពីស្ថាប័នផ្សេងៗគ្នា ហើយរូបថតទាំងអស់ដែលដាក់មកចូលរួម បានបង្ហាញនូវស្នាដៃ និងទេពកោសល្យក្នុងការផ្តិតយករូបភាពដ៏ស្រស់ត្រកាលនៃតំបន់រមណីយដ្ឋានទេសចរណ៍, អេកូទេសចរណ៍, តំបន់ធនធានធម្មជាតិ, វប្បធម៌, បរិស្ថាន រួមទាំងការអភិវឌ្ឍនៅកម្ពុជា។
លោកពុយ គា បន្តថា ដើម្បីធានាដល់ការពិនិត្យ និងវាយតម្លៃលើរូបថតទាំងអស់ឱ្យមានសុក្រិតភាព ក.អ.ក បានបង្កើតគណៈកម្មការកំណែមួយដែលមានសមាសភាពបីរូប ៖ ទី១-លោក ហេង ស៊ីនិត្យ ជាអ្នកថតរូបអាជីពបម្រើក្នុងវិស័យសារព័ត៌មានជាតិនិងអន្តរជាតិជាង៣០ឆ្នាំមកហើយ ក្នុងនោះជិត២០ឆ្នាំជាមួយសារព័ត៌មានដ៏ល្បីរបស់អាមេរិក គឺAssociated Press ហើយក៏ជាគ្រូបង្រៀនផ្នែកថតរូបផងដែរ។
ទី២-លោក ឡាម៉ូ (La Mo) ជាសិល្បករថតរូប និងជាស្ថាបនិក (Unseen Cambodia) ដ៏ល្បីដែលធ្លាប់ទទួលបានពានរង្វាន់ផ្នែកថតរូបថ្នាក់តំបន់ និងអន្តរជាតិចំនួនពីរលើកកាលពីឆ្នាំ២០១៧ និង២០១៨, និងទី៣. លោក ពុយ គា ជាប្រធានអ្នកឆ្លងឆ្លើយឱ្យទីភ្នាក់ងារព័ត៌មាន Kyodo News របស់ជប៉ុនជិត៣០ឆ្នាំ និងជាប្រធានក្លិបអ្នកកាសែតកម្ពុជា។
លោកពុយ គា បន្តថា គណៈកម្មការបានពិនិត្យនិងវិនិច្ឆ័យយ៉ាងល្អិតល្អន់ ហើយវាយតម្លៃជារួមថា រូបថតដែលបេក្ខជនដាក់ចូលរួមប្រកួតប្រជែងមានភាពរស់រវើក ទាក់ទាញ និងស្រស់ស្អាត ហើយគណៈកម្មការសម្រេចជ្រើសរើសជ័យលាភីចំនួន៥រូបដើម្បីទទួលពានរង្វាន់។
អ្នកសារព័ត៌មានទាំង៥រូបរួមមាន ១-ជ័យលាភីលេខ១ លោកលន ហ្សាឌីណា ជាអ្នកសារព័ត៌មានឯករាជ្យ ទទួលបានថវិកាចំនួន ៣លានរៀល និងពានមួយ, ២-ជ័យលាភីលេខ២ លោក គឹម បូរិន មកពីសារព័ត៌មានភ្នំពេញថ្មី ទទួលបានថវិកាចំនួន ២លាន ៥សែនរៀល និងពានមួយ, ៣-ជ័យលាភីលេខ៣ លោក តាំង ឈីនសុធី មកពីទីភ្នាក់ងារសារព័ត៌មាន AFP ទទួលបានថវិកាចំនួន ២លានរៀល និងពានមួយ, ៤-ជ័យលាភីលេខ៤ លោក ហុង មិនា មកពីកាសែតភ្នំពេញប៉ុស្តិ៍ទទួលបានថវិកាចំនួន១លាន ៥សែនរៀល និងពានមួយនិង៥-ជ័យលាភីលេខ៥ លោក ប៉ាន់ បូនីមកពីទូរទស្សន៍បាយ័ន ទទួលបានថវិកាចំនួន១លានរៀល និងពានមួយ។ក្រៅពីរង្វាន់ខាងលើ ជ័យលាភីម្នាក់ៗក៏នឹងទទួលបាននូវសម្ភារមួយចំនួនបន្ថែមទៀត។ ដោយឡែកចំពោះបេក្ខជនចូលរួមប្រកួតប្រជែង តែមិនទទួលជ័យលាភីក៏ទទួលបានរង្វាន់លើកទឹកចិត្តផងដែរ។
ក្លិបអ្នកកាសែតកម្ពុជា បានកត់សម្គាល់ថា ទោះបីជាលើកទី១ សម្រាប់ការប្រកួតប្រជែងនេះ ប៉ុន្តែអ្នកសារព័ត៌មាន និងអ្នកថតរូបឯករាជ្យបានបង្ហាញនូវការចាប់អារម្មណ៍ និងបានផ្ញើរូបថតមកចូលរួមដណ្តើមពានរង្វាន់។ ក.អ.ក សម្តែងការអរគុណចំពោះបេក្ខជនដែលបានចូលរួមក្នុងការប្រកួតប្រជែង ហើយបានសម្រិតសម្រាំងស្នាដៃរបស់ខ្លួន ដើម្បីដណ្តើមពានរង្វាន់ ហើយក៏សូមអបអរសាទរចំពោះជ័យលាភីទាំង៥ រូបផងដែរ។ ទន្ទឹមនោះក៏សោកស្តាយ ចំពោះបងប្អូនជាច្រើនទៀតដែលមានបំណងចូលរួមប្រកួតប្រជែង ប៉ុន្តែពុំមានពេលវេលាគ្រប់គ្រាន់ក្នុងការផ្តិតយករូបភាពនិងសម្រិតសម្រាំង។
ក.អ.ក ជាថ្មីម្តងទៀតចាត់ទុកការប្រកួតប្រជែងនេះ មិនគ្រាន់តែបង្ហាញនូវស្នាដៃ ទេពកោសល្យ ដ៏ប៉ិនប្រសប់របស់បេក្ខជននីមួយៗនោះទេ ប៉ុន្តែអ្វីដែលមានអត្ថន័យគួរឲ្យកត់សម្គាល់នោះ ការក្រកួតប្រជែងរូបថតនាពេលនេះ បានរួមចំណែកយ៉ាងសំខាន់ដល់ការផ្សព្វផ្សាយជួយដល់វិស័យទេសចរណ៍នៅកម្ពុជា។ តាមរយៈរូបថតដែលបានចូលរួម ហើយនឹងត្រូវបន្តផ្សព្វផ្សាយទូលាយក្នុងសារព័ត៌មានជា បន្តបន្ទាប់នោះ អ្នកទេសចរណ៍ជាតិ និងអន្តរជាតិនឹងបានស្វែងយល់ដឹងបន្ថែមទៀតអំពីតំបន់ទេសចរណ៍ ទាំងទេសចរណ៍ ធម្មជាតិ វប្បធម៌ បរិស្ថាន និងតំបន់អេកូទេសចរណ៍រួមទាំងការអភិវឌ្ឍន៍លើគ្រប់វិស័យនៅកម្ពុជា។
ក.អ.ក សូមថ្លែងអំណរគុណចំពោះក្រុមហ៊ុន ស៊ី ភី អល (ខេមបូឌា) ឯ.ក ក្រសួងប្រៃសណីយ៍និងទូរគមនាគមន៍, ក្រសួងរៀបចំដែនដី នគរូបនីយកម្ម និងសំណង់ និង ក្រសួងទេសចរណ៍ ៕(ដោយ ប៉ូច គឹមសុខ)