បរទេស ៖ ខ្មាន់កាំភ្លើងម្នាក់បានបាញ់ជនជាតិស៊ុយអែតពីរនាក់ នៅទីក្រុងព្រុចសែលកាលពីល្ងាចថ្ងៃចន្ទ ដោយជំរុញឱ្យអាជ្ញាធរបញ្ឈប់ការប្រកួតបាល់ទាត់រវាងស៊ុយអែតនិងបែលហ្ស៊ិក ហើយនាំឱ្យអ្នកគាំទ្របាល់ទាត់ជាង ៣៥.០០០នាក់លាក់ខ្លួននៅក្នុងពហុកីឡដ្ឋានជាតិអស់ជាច្រើនម៉ោង ខណៈដែលរដ្ឋធានីបានប្រកាសអាសន្នភេរវកម្មកម្រិតខ្ពស់បំផុតក្នុងពេលដែលជនវាយប្រហារកំពុងគេចខ្លួន។
បើតាមមជ្ឈមណ្ឌលប្រឆាំងភេរវកម្មរបស់បែលហ្ស៊ិកបាននិយាយថា «ហេតុការណ៍នេះបានកើតឡើងនៅចម្ងាយប្រហែល ៥ គីឡូម៉ែត្រពីកីឡដ្ឋានដែលមានអ្នកគាំទ្រជាង ៣៥.០០០ នាក់កំពុងមើលបាល់ទាត់រវាងប៊ែលហ្សិកនិងស៊ុយអែត។ ការប្រកួតត្រូវបានផ្អាកតាំងពីពាក់កណ្តាលទី»។
ចំណែកអ្នកនាំពាក្យមជ្ឈមណ្ឌលប្រឆាំងភេរវកម្ម លោកស្រី ឡូរ៉ា ដេមូលីយ៉េ (Laura Demullier) បាននិយាយថា«ប្រជាជនត្រូវតែមានការប្រុងប្រយ័ត្នយ៉ាងសកម្ម និងចៀសវាងការធ្វើដំណើរដែលមិនចាំបាច់ ។ អាទិភាពកំពូលសម្រាប់អាជ្ញាធរគឺធ្វើឱ្យអ្នកគាំទ្ររាប់ពាន់នាក់ចាកចេញពីកីឡដ្ឋាន King Baudouin ដោយសុវត្ថិភាព»។
មជ្ឈមណ្ឌលនេះបន្តថា ការប្រកាសអាសន្នភេរវកម្មសម្រាប់ប្រទេសទាំងមូលត្រូវបានដំឡើងដល់កម្រិតខ្ពស់បំផុតទីពីរ។ ការដំឡើងកម្រិតអាសន្នភេរវកម្មក្នុងរដ្ឋធានីដល់ចំណាត់ថ្នាក់កំពូលទាំង៤ មានន័យថា «ការគំរាមកំហែងគឺធ្ងន់ធ្ងរខ្លាំងណាស់»។ វាពីមុនឈរនៅលេខ ២ ដែលមានន័យថា ការគំរាមកំហែងគឺមធ្យម។
លោក អាឡិចសាន់ឌឺ ដេ គ្រូ (Alexander De Croo) នាយករដ្ឋមន្រ្តីបាននិយាយថា «ខ្ញុំទើបតែបានចូលរួមរំលែកទុក្ខដ៏ស្មោះស្ម័គ្ររបស់ខ្ញុំទៅកាន់នាយករដ្ឋមន្ត្រីស៊ុយអែត បន្ទាប់ពីការវាយប្រហារដ៏អាក្រក់កាលពីយប់មិញលើពលរដ្ឋស៊ុយអែតនៅទីក្រុងព្រុចសែល»។ គាត់បានបន្ថែមនៅលើ X ដែលពីមុនគេស្គាល់ថា Twitter ថា «ក្នុងនាមជាដៃគូជិតស្និទ្ធ ការប្រយុទ្ធប្រឆាំងនឹងអំពើភេរវកម្មគឺជាការរួមគ្នា»។
ឯលោក អេរិក វ៉ាន់ ដយ (Eric Van Duyse) អ្នកនាំពាក្យការិយាល័យរដ្ឋអាជ្ញាសហព័ន្ធបានប្រាប់ក្រុមអ្នកយកព័ត៌មានថា «ការស៊ើបអង្កេតគឺផ្តោតទៅលើ លទ្ធភាពជំរុញទឹកចិត្តរបស់ភេរវជនសម្រាប់ការបាញ់ប្រហារនេះ»។
លោកដយមិនបាននិយាយថា ជនសង្ស័យប្រហែលស្ថិតនៅទីណាឬក៏ថាតើជនសង្ស័យចូលរួមអាចមានលើសម្នាក់ឬយ៉ាងណាទេ។ លោកនិយាយថា ជនសង្ស័យនៅកំពុងលាក់ខ្លួននៅឡើយ៕ (ប្រែសម្រួលដោយ លោកសំណាង)
