បរទេស ៖ ក្រុមហេសប៊ូឡាដែលគាំទ្រដោយអ៊ីរ៉ង់បាននិយាយថា ការបាញ់ប្រហាររបស់អ៊ីស្រាអែលទៅលើប្រទេសលីបង់បានបណ្តាលឱ្យសមាជិករបស់ខ្លួនបីនាក់បាត់បង់ជីវិតកាលពីថ្ងៃចន្ទម្សិលមិញ ខណៈដែលភាពតានតឹងបានកើនឡើងបន្ទាប់ពីពួកសកម្មប្រយុទ្ធប៉ាឡេស្ទីនបានព្យាយាមជ្រៀតចូលទៅក្នុងទឹកដីអ៊ីស្រាអែលពីប្រទេសលីបង់។
ជម្លោះនៅតាមព្រំដែនភាគខាងជើងរបស់អ៊ីស្រាអែលបានកើតឡើង២ថ្ងៃជាមួយប្រទេសលីបង់ បន្ទាប់ពីពួកសកម្មប្រយុទ្ធហាម៉ាស់ បានបើកការវាយប្រហារមិនធ្លាប់មានពីមុនមកលើផ្នែកខាងត្បូងរបស់អ៊ីស្រាអែលពីតំបន់ហ្គាហ្សាស្ទ្រីប។
ក្រុមហេសប៊ូឡាបាននិយាយថា «ពួកគេបានចេញសេចក្តីថ្លែងការណ៍ចំនួនបីដាច់ដោយឡែកពីគ្នាដែលបញ្ជាក់ពីការស្លាប់របស់សមាជិករបស់ខ្លួន ដែលពួកគេទាំងអស់ បានធ្វើទុក្ករកម្មជាលទ្ធផលនៃការឈ្លានពានរបស់ពួកជ្វីហ្វនិយមនៅភាគខាងត្បូងប្រទេសលីបង់នៅរសៀលថ្ងៃចន្ទម្សិលមិញ»។
បន្ទាប់មកក្រុមនេះបាននិយាយថា «ពួកគេបានសងសឹកដោយវាយប្រហារបន្ទាយទាហានអ៊ីស្រាអែលចំនួនពីរ»។
ចំណែកក្រុមហេសប៊ូឡាបាននិយាយនៅក្នុងសេចក្តីថ្លែងការណ៍មួយថា «ក្រុមតស៊ូអ៊ីស្លាម (ហេសប៊ូឡា) ក្នុងការឆ្លើយតបដំបូង បានវាយប្រហារបន្ទាយទាហានអ៊ីស្រាអែលចំនួនពីរ ដោយប្រើមីស៊ីលបញ្ជាទិសនិងគ្រាប់កាំភ្លើងត្បាល់ដែលវាយចំពួកគេដោយផ្ទាល់»។
ឯសហរដ្ឋអាមេរិកកាលពីថ្ងៃចន្ទ បានព្រមានក្រុមមូស្លីមនិកាយស៊ីអ៊ីតនេះកុំឱ្យបើកសមរភូមិមួយទៀត ក្នុងសង្រ្គាមជាមួយអ៊ីស្រាអែល។
ចំណែកមន្ត្រីការពារជាតិអាមេរិកជាន់ខ្ពស់ម្នាក់បានប្រាប់អ្នកកាសែតថា «យើងមានការព្រួយបារម្ភយ៉ាងខ្លាំងអំពីក្រុមហេសប៊ូឡាធ្វើការសម្រេចចិត្តខុស ហើយជ្រើសរើសបើកសមរភូមិទីពីរចំពោះជម្លោះនេះ»៕(ប្រែសម្រួលដោយលោកសំណាង)