ភ្នំពេញ ៖ ផ្ទះល្វែងក្រោមថ្មលើឈើមួយគ្រួសារត្រូវបានអគ្គិភ័យឆាបឆេះយ៉ាងសន្ធោសន្ធៅ ដោយសារដុតភ្លើងទៀនធូបសែននំផ្លែឈើក្នុងថ្ងៃសីល បង្កជាអគ្គិភ័យនៅវេលាម៉ោង១២និង៤០នាទីយប់ អធ្រាត្រឈានចូលថ្ងៃសៅរ៍ ទី៣០កញ្ញា ឆ្នាំ២០២៣ នៅចំណុចផ្លូវបេតុង ជិតបុរីឈូកវ៉ា២ ក្នុងភូមិតិក្ខប្បបញ្ញោ សង្កាត់សំរោងក្រោម ខណ្ឌពោធិ៍សែនជ័យ បណ្តាលឱ្យម្ចាស់ផ្ទះបាត់បង់ជីវិត ។
សមត្ថកិច្ចបានឱ្យដឹងថា ជនរងគ្រោះដែលស្លាប់ឈ្មោះឡាច សាម៉ុន ភេទប្រុស អាយុ៥៨ឆ្នាំ ជនជាតិខ្មែរ មុខរបរលក់ដូរអីវ៉ាន់ចាប់ហួយ និងជាអតីតមន្រ្តីយោធាចូលនិវត្តន៍។ ចំណែកម្ចាស់ផ្ទះឈ្មោះ ម៉ុន លក្ខិណា ភេទស្រី អាយុ២០ឆ្នាំត្រូវជាកូនបង្កើតជនរងគ្រោះខាងលើ។ ប្រភេទសំណង់ផ្ទះដែលឆេះសង់អំពីថ្មក្រោមឈេីលេី ទំហំ ៦ម៉ែត្រ គុណនឹង១២ម៉ែត្រ។ មូលហេតុដោយសារអុជភ្លើងទៀនធូប ក្នុងថ្ងៃសីលមិនបានរលត់ក៏នាំគ្នាដេកលក់អស់បង្កជាអគ្គីភ័យឆាបឆេះឡើងតែម្តង ។
គ្រោះអគ្គិភ័យខាងលើនេះប្រេីប្រាស់រថយន្តពន្លត់ អគ្គីភ័យអស់ចំនួន៩គ្រឿង ក្នុងនោះរថយន្តនគរបាលរាជធានីភ្នំពេញ៨គ្រឿងនិង រថយន្ត អង្គភាព៧១១ កងពលតូចលេខ៧០ ចំនួន៤គ្រឿងជួយអន្តរាគមន៍ ហើយរលត់នៅវេលាម៉ោង១និង៤០នាទីយប់នៅថ្ងៃខែឆ្នាំដដែល៕(ដោយ ៖ ធ្នូជ័យ)
