បរទេស ៖ អឌ្ឍចន្ទក្រហមប្រទេសលីប៊ីបាននិយាយកាលពីថ្ងៃព្រហស្បតិ៍ម្សិលមិញថា «មានចំនួមអ្នកបាត់បង់ជីវិត ក្នុងទីក្រុងឆ្នេរសមុទ្រ ដឺណា (Derna) របស់ប្រទេសលីប៊ីបានកើនឡើងដល់ ១១.០០០ នាក់ ខណៈកិច្ចខិតខំប្រឹងប្រែងស្វែងរកនៅតែបន្ត បន្ទាប់ ពីគ្រោះមានទឹកជំនន់ដ៏ធំដែលបង្កឡើងពីការបាក់ទំនប់ទឹកពីរក្នុងពេលមានភ្លៀងធ្លាក់ខ្លាំង»។
លោកស្រី ម៉ារី អែល ដ្រេសសេ (Marie el-Drese) អគ្គលេខាធិការនៃអង្គការផ្តល់ជំនួយខាងលើនេះ បានប្រាប់ទីភ្នាក់ងារសារព័ត៌មាន The Associated Press តាមទូរស័ព្ទថា «មានមនុស្ស ១០.១០០ នាក់ទៀតត្រូវបានរាយការណ៍ថាកំពុងបាត់ខ្លួន នៅក្នុងទីក្រុងជាប់សមុទ្រមេឌីទែរ៉ាណេនេះ។ អាជ្ញាធរសុខាភិបាលមុននេះបានដាក់ចំនួនអ្នកស្លាប់នៅទីក្រុងដឺណាត្រឹម ៥.៥០០ នាក់។ ព្យុះភ្លៀងនេះក៏បានធ្វើឱ្យមនុស្សប្រហែល ១៧០ នាក់បាត់បង់ជីវិតនៅកន្លែងផ្សេងទៀតក្នុងប្រទេសដែរ»។
គ្រោះទឹកជំនន់នេះ បានលេបត្របាក់គ្រួសារទាំងមូលៗនៅក្នុងទីក្រុងដឺណាកាលពីយប់ថ្ងៃអាទិត្យ ហើយបានលាតត្រដាងឱ្យឃើញពីភាពងាយរងគ្រោះនៅក្នុងប្រទេសសម្បូរប្រេងនេះ ដែលបានជាប់គាំងនៅក្នុងជម្លោះចាប់តាំងពីការបះបោរឆ្នាំ ២០១១ ដែលបានផ្តួលរំលំមេដឹកនាំផ្តាច់ការយូរអង្វែង លោក ម៉ូអាម៉ា ហ្គាដាហ្វ៊ី (Moammar Gadhafi)៕(ប្រែសម្រួលដោយ លោកសំណាង)
