ភ្នំពេញ ៖ ស្ត្រីម្នាក់រងរបួសធ្ងន់ បន្ទាប់ពីបើករថយន្តលឿនពេក ជ្រុលបុករថយន្តធុនធំដឹកប្រេងសាំង ខណៈពេលដែលកំពុងតែឈប់ស្តុបយ៉ាងពេញទំហឹង កើតឡើងកាលពីវេលាម៉ោង១និង២០នាទីយប់ រំលងអធ្រាត្រឈានចូលថ្ងៃព្រហស្បតិ៍ ទី១០សីហា ឆ្នាំ២០២៣ ត្រង់ចំណុចស្តុបវត្តនិរោធ ផ្លូវជាតិលេខ១ ក្នុងសង្កាត់និរោធ ខណ្ឌច្បារអំពៅ ។
យោងតាមប្រភពពីកន្លែងកើតហេតុបានឱ្យដឹងថា ដំបូងគេឃើញរថយន្តធុនធំដឹកប្រេងសាំង ពណ៌ស ពាក់ស្លាកលេខភ្នំពេញ3G-1012 ខណៈកំពុងតែឈប់ស្តុបរង់ចាំស្តុបពណ៌បៃតង ក៏ស្រាប់តែមានរថយន្តឡង់គ្រីស័រ ពណ៌ខ្មៅ ពាក់ស្លាកលេខភ្នំពេញ2BA-6683 បើកបរដោយស្ត្រីម្នាក់ តាមបណ្ដោយផ្លូវជាតិលេខ១ ទិសដៅពីលិចមកកើតយ៉ាងលឿន ក៏បុកចំពីក្រោយរថយន្តដឹកសាំងពេញទំហឹងបណ្ដាលឲ្យខ្ទេចផ្នែកខាងមុខ ហើយរងរបួសធ្ងន់ស្ត្រីដែលជាអ្នកបើក ភ្លាមៗត្រូវបានរថយន្តសាមុយដឹកយកទៅសង្គ្រោះ ។
ក្រោយកើតហេតុសមត្ថកិច្ចជំនាញចុះមកវាស់វែងយកមធ្យោបាយទាំងពីរគ្រឿងទៅរក្សាទុក រង់ចាំដោះស្រាយគ្នានៅពេលក្រោយ៕(ដោយធ្នូជ័យ)
