បរទេស ៖ មេធាវីរបស់ក្រុមបវរកញ្ញាចក្រវាលឥណ្ឌូនេស៊ីបាននិយាយកាលពីថ្ងៃអង្គារម្សិលមិញថា បេក្ខនារី ៦ រូបនៃកម្មវិធីប្រឡងបវរកញ្ញាចក្រវាលឥណ្ឌូនេស៊ីបានដាក់ពាក្យបណ្តឹងទៅដល់ប៉ូលិស ដោយចោទប្រកាន់អ្នករៀបចំពីបទ«បៀតបៀនផ្លូវភេទ»បន្ទាប់ពីពួកនាងបានចោទប្រកាន់ថា «ពួកនាងបានទទួលរងនូវ ការត្រួតពិនិត្យរាងកាយដោយគ្មានអាវទ្រនាប់»។
ប៉ូលិសបានបញ្ជាក់ថា «បេក្ខនារីបានដាក់ពាក្យបណ្តឹង ហើយរឿងនេះនឹងត្រូវបើកការស៊ើបអង្កេត»។ បេក្ខនារីនៃកម្មវិធីប្រឡងបវរកញ្ញាចក្រវាលឥណ្ឌូណេស៊ី ដែលប្រារព្ធធ្វើនៅរដ្ឋធានីហ្សាការតាកាលពីថ្ងៃទី ២៩ ខែកក្កដា ដល់ថ្ងៃទី ៣ ខែសីហា បាននិយាយថា អ្នករៀបចំបានស្នើឱ្យពួកនាង៥នាក់ស្រាតទុកតែខោទ្រនាប់ដើម្បីពិនិត្យរាងកាយក្នុងបន្ទប់មួយដែលមានមនុស្សជាង ២០ នាក់ រួមទាំងបុរសៗ។
ចំណែកមេធាវីរបស់ពួកនាងគឺលោកស្រី មែលលីសា អាងហ្គ្រែនី (Mellisa Anggraeni) បាននិយាយថា «បេក្ខនារីទាំង៥នាក់នោះត្រូវបានគេថតរូបដោយគ្មានអាវទ្រនាប់»ដោយបន្ថែមថា«មិនចាំបាច់ត្រួតពិនិត្យដល់ថ្នាក់នេះទេ»។លោកស្រីបាននិយាយថា បេក្ខនារីចំនួន ៦ នាក់បានដាក់ពាក្យបណ្តឹង។
អ្នកប្តឹងម្នាក់បានប្រាប់សន្និសីទសារព័ត៌មាន ដែលផ្សាយដោយទូរទស្សន៍ Kompas TV ថា នាងត្រូវបានគេស្នើសុំឈរថតរូបកាច់រាងមិនសមរម្យ រួមទាំងការកន្ធែកជើងទៀតផង។ បេក្ខនារីមិនបញ្ចេញឈ្មោះនោះបាននិយាយថា «ខ្ញុំមានអារម្មណ៍ថាខ្ញុំស្រាតឱ្យគេមើល។ ខ្ញុំមានអារម្មណ៍ច្របូកច្របល់និងមិនស្រួលក្នុងចិត្ត។ទូរទស្សន៍នោះបានដាក់រូបភាពព្រិលៗលើមុខនាង»
ទីភ្នាក់ងារសារព័ត៌មានរ៉យទ័របានព្យាយាមទាក់ទងក្រុមហ៊ុន ដែលគ្រប់គ្រងកម្មវិធីប្រឡងបវរកញ្ញាចក្រវាលឥណ្ឌូនេស៊ី PT Capella Swastika Karya និងស្ថាបនិកក្រុមហ៊ុនគឺលោកស្រី ប៉ុបពី កាប៉ែលឡា (Poppy Capella) តាមរយៈគណនីបណ្តាញសង្គមរបស់ពួកគេ «ប៉ុន្តែពួកគេមិនបានឆ្លើយតបទេ»៕(ប្រែសម្រួលដោយ លោកសំណាង)
