បរទេស ៖ សត្វដំរីថៃមួយក្បាល ដែលគេផ្តល់ជាអំណោយដល់ស្រីលង្កា កាលពីពីរទសវត្សរ៍មុន បានវិលត្រឡប់មកប្រទេសកំណើតវិញ នាថ្ងៃអាទិត្យម្សិលមិញ បន្ទាប់ពីមានជម្លោះការទូត ជុំវិញការធ្វើបាបសត្វដំរីនេះ។
អាជ្ញាធរថៃបានប្រគល់ដំរីឈ្មោះ មូធូ រ៉ាចា (Muthu Raja) អាយុ ២៩ ឆ្នាំ ដែលគេស្គាល់ក្នុងស្រុកកំណើតថា «សាក់សូរិន (Sak Surin) ទៅប្រទេសស្រីលង្កាក្នុងឆ្នាំ ២០០១»។ ប៉ុន្តែពួកគេបានទាមទារវាមកវិញកាលពីឆ្នាំមុន បន្ទាប់ពីមានការចោទប្រកាន់ថា វាត្រូវបានធ្វើទារុណកម្មនិងទុកចោល ខណៈឱ្យវារស់ក្នុងវត្តព្រះពុទ្ធសាសនាមួយនៅភាគខាងត្បូងនៃប្រទេសស្រីលង្កា ។
សត្វដំរី មានទម្ងន់ ៤.០០០ គីឡូក្រាមនេះបានមកដល់ប្រទេសថៃ បន្ទាប់ពីម៉ោង២រសៀលថ្ងៃអាទិត្យម្សិលមិញ ក្រោយដឹកក្នុងទ្រុងដែកធំមួយ ដែលសាងសង់ជាពិសេសនៅលើយន្តហោះដឹកទំនិញ Ilyushin Il-76 ។
លោក វ៉ារ៉ាវុធ សិល្បៈអាចា (Varawut Silpa-archa) រដ្ឋមន្ត្រីក្រសួងបរិស្ថានថៃ បាននិយាយពីអាកាសយានដ្ឋានថា«គាត់(ដំរី)បានមកដល់ខេត្តឈៀងម៉ៃយ៉ាងល្អឥតខ្ចោះ ។ គាត់បានធ្វើដំណើរ៥ម៉ោង ហើយមិនមានបញ្ហានោះទេស្ថានភាពរបស់គាត់គឺធម្មតា»។
លោកបានបន្ថែមថា «ប្រសិនបើអ្វីៗដំណើរការល្អ យើងនឹងផ្លាស់វាចេញ ដោយសំដៅលើផែនការយកដំរីនេះទៅដាក់នៅព្រៃបម្រុងធម្មជាតិក្បែរនោះ»៕(ប្រែសម្រួលដោយ លោកសំណាង)
