បរទេស ៖ តុលាការប្រទេសសិង្ហបុរីបានប្រហារជីវិតបុរសម្នាក់ ពីបទសមគំនិតក្នុងការ«ជួញដូរកញ្ឆា» ទោះបីជាមានការអង្វរសុំការលើកលែងទោសពីក្រុមគ្រួសារ សកម្មជន និង អង្គការសហប្រជាជាតិ ក៏ដោយ ។
គ្រួសាររបស់គេបាននិយាយថា តាំងហ្គារ៉ាជូ ស៊ូបព្យ៉ា (Tangaraju Suppiah) អាយុ ៤៦ ឆ្នាំត្រូវបានព្យួរកនៅពន្ធនាគារឆាងជី (Changi) នៅព្រឹកព្រលឹមថ្ងៃពុធទី២៦មេសាឆ្នាំ២០២៣នេះហើយ។
សកម្មជនបាននិយាយថា គាត់ត្រូវបានផ្តន្ទាទោសដោយផ្អែកលើភស្តុតាងទន់ខ្សោយ ហើយទទួលបានការការពារពីច្បាប់ មានកម្រិតក្នុងអំឡុងពេលការកាត់ទោសគាត់។
អាជ្ញាធរបាននិយាយថា រូបគេបានទទួលនីតិវិធីកាត់ទោសត្រឹមត្រូវ និងបានរិះគន់សកម្មជនដែលបានដាក់មន្ទិលមកលើតុលាការ។
ប្រទេសសិង្ហបុរីមានច្បាប់ប្រឆាំងគ្រឿងញៀនដ៏តឹងតែងបំផុតលើពិភពលោក ដែលខ្លួនអះអាងថា«ជាការទប់ទល់ដ៏ចាំបាច់ក្នុងការទប់ស្កាត់ឧក្រិដ្ឋកម្មគ្រឿងញៀន»៕(ប្រែសម្រួលដោយ លោកសំណាង)
