ភ្នំពេញ ៖ ជនសង្ស័យបានបាត់បង់ជីវិត និងជនសង្ស័យ៦នាក់ ត្រូវបានឃាត់ខ្លួន ក្នុងប្រតិបត្តិការបង្ក្រាបគ្រឿងញៀន កាលពីវេលាទៀបភ្លឺ ឈានចូលថ្ងៃចន្ទ ទី២៤ ខែមេសា ឆ្នាំ២០២៣ នៅក្នុងខុនដូរាជសម្បត្តិ បន្ទប់លេខ ១០.០៥ ជាន់ទី១០ ស្ថិតនៅតាមបណ្តោយផ្លូវលេខ៥៩៦ ភូមិទី៣ សង្កាត់បឹងកក់ទី២ខណ្ឌទួលគោក រាជធានីភ្នំពេញ ។
សមត្ថកិច្ចនៃមន្ទីរប្រឆាំងគ្រឿងញៀន ក្រសួងមហាផ្ទៃបានឱ្យដឹងថា សមត្ថកិច្ចបានដកហូតគ្រឿងញៀន និងសម្ភារៈបម្រើដល់បទល្មើសមួយចំនួន និងឃាត់ជនសង្ស័យចំនួន៦នាក់ ទី១ ឈ្មោះ មុំ ភារុណ ភេទប្រុស អាយុ១៤ឆ្នាំ ទី២ ឈ្មោះលីវ យៀកស៊ីវ ភេទប្រុស អាយុ១៨ឆ្នាំ ទី៣ឈ្មោះ លី សុជាតា ភេទស្រី អាយុ២២ឆ្នាំ ទី៤ ឈ្មោះសូ ពិសិដ្ឋ ភេទប្រុស អាយុ២០ឆ្នាំ ទី៥ ឈ្មោះអ៊ួន រ៉ូត ភេទប្រុស អាយុ១៦ឆ្នាំ និងទី៦ ឈ្មោះឆេង សុខឡេង ភេទប្រុស អាយុ១៦ឆ្នាំ ។
ជនសង្ស័យទី៧ ដែលបានបាត់បង់ជីវិត មានឈ្មោះ លាង ភេទប្រុស អាយុប្រមាណ២៥ឆ្នាំ ជាជនជាតិខ្មែរ បានរបូតដៃធ្លាក់ពីជាន់ទី១០ នៃបន្ទប់ចំណុចប្រតិបត្តិការ ដោយសារជនសង្ស័យ បានគេចចេញតាមបង្អួច តោងរំកិលបំណងឆ្លងទៅបន្ទប់ផ្សេង តែចៃដន្យរបូតដៃធ្លាក់មក ។
បន្ទាប់ពីមានករណីបែបនេះ កម្លាំងនគរបាលជំនាញផ្នែកកោសលវិច័យ និងមូលដ្ឋាន ក៏បានចុះទៅត្រួតពិនិត្យសាកសពផងដែរ ឯជនសង្ស័យទាំង៦នាក់ ត្រូវបានបញ្ជូនទៅកាន់ការិយាល័យ នៃមន្ទីរប្រឆាំងគ្រឿងញៀន ដើម្បីសាកសួរនិងបន្តតាមនីតិវិធី ៕ ដោយ៖ ប៉ូច គឹមសុខ
