បរទេស ៖ មានករណីអ្នកស្រុករាប់ពាន់នាក់ បានភៀសខ្លួនចេញពីរដ្ឋធានីរបស់ស៊ូដង់ ជាទីដែលសាក្សីរាយការណ៍អំពីសាកសពជាច្រើននៅតាមដងផ្លូវ និង ស្ថានទូតនានានិយាយថា «មានជនស៊ីវិលជាង ២៧០ នាក់បាត់បង់ជីវិត នៅក្នុងការប្រយុទ្ធគ្នារវាងកងទ័ពនិងកងជីវពល គិតត្រឹមថ្ងៃព្រហស្បតិ៍ទី២០មេសា ឆ្នាំ២០២៣ដោយគ្មានសញ្ញានៃទីបញ្ចប់នោះទេ»។
នាង អាឡាវយ៉ា អាល់ តាយ៉េប (Alawya al-Tayeb) អាយុ ៣៣ ឆ្នាំ បាននិយាយនៅតាមផ្លូវរបស់នាងដែលកំពុងចាកចេញពីទីក្រុង យ៉ាងដូច្នេះថា «ជីវិតនៅក្នុងទីក្រុងកាទុំ (Khartoum) គឺមិនអាចទៅរួចទេ ប្រសិនបើសង្រ្គាមមិនបញ្ឈប់នោះ។នាងខ្ញុំបានព្យាយាមធ្វើឱ្យកូនៗកុំមើលឃើញសាកសពនៅតាមដងផ្លូវ ។ កូនរបស់នាងបានរងរបួសផ្លូវចិត្តរួចទៅហើយ ហើយត្រូវការព្យាបាល»។
ចំណែកកងជីវពលរបស់កងកម្លាំងគាំទ្ររហ័ស (RSF) បាននិយាយថា «ពួកគេនឹង ប្តេជ្ញាចិត្តទាំងស្រុងចំពោះបទឈប់បាញ់ពេញលេញ ចាប់ពីម៉ោង១៦ម៉ោងសកល សម្រាប់រយៈពេល ២៤ ម៉ោងដូចកងទ័ពដែរ»។
ប៉ុន្តែសាក្សីនិយាយថា ការបាញ់ប្រហារបានបន្តនៅក្នុងទីក្រុងកាទុំចាប់ពីម៉ោងដែលបានកំណត់រហូតដល់យប់ថ្ងៃពុធ។វាជាថ្ងៃទីពីរជាប់គ្នាដែលបទឈប់បាញ់សម្រាប់មនុស្សធម៌ដែលបានស្នើឡើងត្រូវបានខកខានអនុវត្ត។
ឯកងទ័ពស៊ូដង់បាននិយាយថា «ទាហានអេហ្ស៊ីប១៧៧នាក់ ដែលត្រូវបានចាប់ខ្លួនដោយកងជីវពល RSF នៅទីក្រុងមេរ៉ូវី (Merowe) ភាគខាងជើងត្រូវបានជម្លៀសកាលពីថ្ងៃពុធ ត្រឡប់ទៅប្រទេសអេហ្ស៊ីបវិញ ដែលជាសម្ពន្ធមិត្តជិតស្និទ្ធរបស់យោធា តាមយន្តហោះដឹកជញ្ជូនយោធាអេហ្ស៊ីបចំនួនបួនគ្រឿង។
ចំពោះផែនការជម្លៀសផ្សេងទៀត មានការលំបាកក្នុងការរៀបចំ ខណៈអ្នកការទូតបរទេសត្រូវបានវាយប្រហារហើយអង្គការសហប្រជាជាតិបានទទួលរបាយការណ៍អំពីអំពើហិង្សាផ្លូវភេទ លើបុគ្គលិកជំនួយនានា។
លោក អង់តូនីញ៉ូ គូថេរ៉េស អគ្គលេខាធិការអ.ស.ប. បានប្រកាសថា លោកនឹងជួបជាមួយប្រធានសហភាពអាហ្រ្វិកសម្ពន្ធអារ៉ាប់ និង ប្លុកតំបន់ ដែលមានឈ្មោះថា អាជ្ញាធរអន្តររដ្ឋាភិបាលស្តីពីការអភិវឌ្ឍ។ នេះបើតាមអ្នកនាំពាក្យរបស់លោកប្រាប់ទៅអ្នកយកព័ត៌មាន។
ចំណែកអំពើហិង្សានេះបានផ្ទុះឡើង កាលពីថ្ងៃសៅរ៍ រវាងកងកម្លាំងរបស់ឧត្តមសេនីយ៍ពីររូប ដែលបានដណ្តើមអំណាចនៅក្នុងរដ្ឋប្រហារឆ្នាំ ២០២១ គឺ រវាងមេទ័ព អាប់ដែល ហ្វាតតា អាល់-បឺហាន (Abdel Fattah al-Burhan) និង អនុប្រធានរបស់ខ្លួនដែលជាមេបញ្ជាការកងជីវពលដ៏មានឥទ្ធិពលRSFលោក ម៉ូហាម៉េដ ហាមដាន ដាកឡូ (Mohamed Hamdan Daglo)៕(ប្រែសម្រួលដោយ លោកសំណាង)