បរទេស ៖ មានករណីបុគ្គលិកធនាគារអាយុ ២៣ ឆ្នាំម្នាក់បានបើកការបាញ់ប្រហារនៅកន្លែងធ្វើការរបស់គាត់ កាលពីថ្ងៃចន្ទទី១០មេសាឆ្នាំ២០២៣ នៅទីក្រុងល្វីសវីល (Louisville) ក្នុងរដ្ឋកេនថាក់គី (Kentucky) របស់សហរដ្ឋអាមេរិកបណ្តាលឱ្យមនុស្សបួននាក់បាត់បង់ជីវិត និង របួស៩នាក់នៅក្នុងការវាយប្រហារផ្សាយផ្ទាល់មុនពេលប៉ូលិសបាញ់លើខ្មាន់កាំភ្លើង ។
ភ្លាមៗនោះប៉ូលិសបានកំណត់អត្តសញ្ញាណខ្មាន់កាំភ្លើង នៅក្នុងការសម្លាប់រង្គាលចុងក្រោយបង្អស់របស់អាមេរិកថា«ជាបុរសស្បែកសម្នាក់ឈ្មោះ ខុនន័រ ស្ទួចឹន (Connor Sturgeon)» ហើយនិយាយថា «រូបគាត់ជាបុគ្គលិករបស់ធនាគារ Old National Bank ដែលមានទីតាំងនៅកណ្តាលទីក្រុងធំបំផុតរបស់រដ្ឋកេនថាក់គីមួយនេះ»។
បន្ទាប់មកប៉ូលិសបានទទួលរបាយការណ៍អំពីការបាញ់កាំភ្លើងនៅក្នុងធនាគារនៅម៉ោង ៨និង៣៨ ព្រឹក (1238 GMT) ហើយបានទៅដល់កន្លែងកើតហេតុក្នុងពេលបីនាទី។ លោកស្រី ជែកក្វេលីន គ្វីនវីលឡារ៉ូអែល (Jacquelyn Gwinn-Villaroel) មេប៉ូលិសស្តីទីបានប្រាប់សន្និសីទសារព័ត៌មានមួយនៅរសៀលថ្ងៃដដែលថា «ជនសង្ស័យបានបាញ់ទៅលើមន្ត្រីប៉ូលិស ដែលបាញ់តបតវិញ ហើយសម្លាប់រូបគេតែម្តង»។
លោកស្រីបាននិយាយថា «ជម្រើសអាវុធរបស់គេគឺកាំភ្លើងវែង»ដោយមិនបញ្ជាក់ថាតើវាជាប្រភេទអាវុធវាយប្រហារឬយ៉ាងណាទេ ដែលវាតែងត្រូវបានប្រើនៅក្នុងការសម្លាប់រង្គាល ដែលបានក្លាយជារឿងសោកសៅជាទូទៅនៅក្នុងសហរដ្ឋអាមេរិក។
លោកស្រីគ្វីនវីលឡារ៉ូអែល បន្តថា «ជនសង្ស័យកំពុងផ្សាយផ្ទាល់ ហើយជាអកុសល វាជាសោកនាដកម្ម ដែលដឹងថាឧបទ្ទវហេតុបានកើតឡើងនៅទីនោះ ហើយត្រូវបានថតជាវីដេអូ»។
អ្នកនាំពាក្យក្រុមហ៊ុន Meta របស់ Instagram បានប្រាប់ទីភ្នាក់ងារសារព័ត៌មាន AFP ថា «ក្រុមហ៊ុនកំពុងទាក់ទងជាមួយមន្ត្រីអនុវត្តច្បាប់ ហើយបានលុបចោលការផ្សាយផ្ទាល់នៃឧបទ្ទវហេតុសោកនាដកម្មនេះភ្លាមៗនៅព្រឹកនេះ»។
មិនមានការលើកឡើងភ្លាមៗណាមួយអំពីចេតនារបស់ជនសង្ស័យនោះទេ ប៉ុន្តែទូរទស្សន៍ CNN បានស្រង់ប្រភពសមត្ថកិច្ចដែលនិយាយថា «រូបគេទើបតែទទួលបានដំណឹងថា រូបគេបានបាត់បង់ការងារ»។
លោកស្រីគ្វីនវីលឡារ៉ូអែលបាននិយាយថា អ្នករបួសបីនាក់ស្ថិតក្នុងស្ថានភាពធ្ងន់ធ្ងរ រួមទាំងមន្ត្រីប៉ូលិសម្នាក់ ដែលត្រូវគ្រាប់កាំភ្លើងចំក្បាល ដោយបន្ថែមថា មន្ត្រីម្នាក់ទៀតក៏រងរបួសផងដែរ។ មនុស្សដែលស្លាប់មានបុរសអាយុ ៤០ ឆ្នាំ, ៦៣ ឆ្នាំ និង ៦៤ ឆ្នាំ រួមនឹងស្ត្រីអាយុ ៥៧ ឆ្នាំម្នាក់។
បុរសម្នាក់ក្នុងចំណោមអ្នកស្លាប់នោះគឺលោក ថមមី អែលលៀត (Tommy Elliot) អាយុ ៦៣ ឆ្នាំជាមិត្តភក្តិរបស់អភិបាលក្រុងល្វីសវីលនិងអភិបាលរដ្ឋកេនថាក់គី របស់បក្សប្រជាធិបតេយ្យ។ លោកថមមីធ្លាប់បាននិយាយថា«គាត់បានធ្វើយុទ្ធនាការបោះឆ្នោតចេញពីអគារដែលការបាញ់ប្រហារបានកើតឡើង»៕(ប្រែសម្រួលដោយលោកសំណាង)
