កំពង់ស្ពឺ ៖ លំនៅដ្ឋាន១ខ្នង បានរងការឆាបឆេះ បង្កការភ្ញាក់ផ្អើល កាលពីវេលាម៉ោង ១២និង៤៥នាទីថ្ងៃត្រង់ ថ្ងៃអាទិត្យទី០៩ ខែមេសា ឆ្នាំ២០២៣ នៅចំណុចភូមិចាស់ ឃុំពេជមុនី ស្រុកគងពិសី ខេត្តកំពង់ស្ពឺ ។
នគរបាលខេត្តកំពង់ស្ពឺបានឱ្យដឹងថា អគ្គីភ័យបានឆាបឆេះលំនៅដ្ឋាប មានទំហំ៨ម៉ែត្រគុណនឹង៩ម៉ែត្រ ធ្វើអំពីឈើប្រក់ក្បឿងមានជញ្ជាំងក្ដារ ឈើលើ ថ្មខាងក្រោមរៀបឥដ្ឋ កម្មសិទ្ធិរបស់ ឈ្មោះ ឆឹង លីម ភេទស្រី អាយុ៤៣ឆ្នាំ នៅភូមិឃុំខាងលើ ។
នគរបាលខេត្តបានបន្តថា យោងតាមសាក្សីនិងជាអ្នកឃេីញហេតុការណ៍ដំបូង ឃើញមានបុរសម្នាក់បានធ្វើសកម្មភាពដុតផ្ទះតែម្ដង បុគ្គលនោះមានឈ្មោះខឿន សុភីន ភេទប្រុស អាយុ២១ឆ្នាំ ត្រូវជាកូនបង្កើត ម្ចាស់ផ្ទះរងគ្រោះ ។
តាមការបញ្ជាក់ពីក្រុមគ្រួសារ និងអ្នកជិតខាង កូនដែលុដុតផ្ទះខ្លួនឯង គឺជាមនុស្សមានសតិពេញលេញ មិនមែនជាជនមានវិបល្លាសស្មារតីនោះទេ ប៉ុន្តែមូលហេតុដែលនាំឱ្យកូនហ៊ាន លេីកដៃយកភ្លើងដុតផ្ទះខ្លួននេះ គឺមកពីខឹងម្ដាយមិនបំពេញ បំណងរបស់ខ្លួន ( ទិញម៉ូតូមុនចូលឆ្នាំ)។
ក្នុងហេតុការណ៍គ្រោះថ្នាក់អគ្គីភ័យ សមត្ថកិច្ចបានប្រើប្រាស់រថយន្តពន្លត់អគ្គិភ័យ០១គ្រឿង អស់ទឹកចំនួន០២ឡានទប់ស្កាត់ ហើយករណីនេះពុំបង្កការរងរបួសដល់មនុស្សឡើយ ។ បច្ចុប្បន្នសមត្ថកិច្ចបាន ឃាត់ខ្លួនអ្នកបង្ក មកសាកសួរនិងចំណាត់ការ តាមនីតិវិធី ៕ ដោយ ៖ ប៉ូច គឹមសុខ
