បរទេស ៖ រោងចក្រ សហគ្រាសកាត់ដេរជាច្រើន មានការបញ្ជាទិញរហូតដល់ត្រឹមខែមេសាឆ្នាំ២០២៣ប៉ុណ្ណោះខណៈកាលពីឆ្នាំមុនរោងចក្រ សហគ្រាសទាំងនោះមានការបញ្ជាទិញល្មមដើម្បីរក្សាពួកគេឱ្យរវល់យ៉ាងហោចណាស់ បានពីរត្រីមាស។
បើតាមអ្នកគ្រប់គ្រងផលិតកម្មនៅសហគ្រាសវាយនភណ្ឌមួយនៅសង្កាត់ធូឌុក (Thu Duc) នៃទីក្រុងហូជីមិញបាននិយាយថា «កាលពីឆ្នាំមុនក្រុមហ៊ុនរបស់គាត់ត្រូវជ្រើសរើសយកការបញ្ជាទិញដើម្បីចុះហត្ថលេខាលើកិច្ចសន្យា ប៉ុន្តែឥឡូវនេះមានការបញ្ជាទិញសម្រាប់តែខែមួយនេះប៉ុណ្ណោះ»។
លោក ខាវ ហ៊ូ ហ៊ីវ (Cao Huu Hieu) អគ្គនាយកនៃក្រុមហ៊ុនវាយនភណ្ឌនិងកាត់ដេរជាតិវៀតណាម (Vinatex) បាននិយាយថា «ស្ថានភាពក្នុងរយៈពេលប៉ុន្មានខែដំបូងនៃឆ្នាំនេះគឺអាក្រក់ខ្លាំងណាស់។ តម្លៃនៃការបញ្ជាទិញជាច្រើនបានធ្លាក់ចុះ ២-៣ភាគរយ ។ ក្រុមហ៊ុនទាំងនោះមានការបញ្ជាទិញរហូតដល់ខែមេសា ខណៈកាលពីឆ្នាំមុនមានការបញ្ជាទិញរហូតដល់ខែធ្នូ»។
លោក ផាម សួន ហុង (Pham Xuan Hong) ប្រធានសមាគមវាយនភណ្ឌនិងកាត់ដេរនៃទីក្រុងហូជីមិញ បាននិយាយថា «ទីផ្សារធំៗដូចជាសហរដ្ឋអាមេរិក និងអឺរ៉ុប មិនបានបង្ហាញសញ្ញានៃការងើបឡើងវិញទេ»។
លោកហ៊ីវបន្តថា «ទីផ្សារពិភពលោកអាចធ្លាក់ចុះពី ៧៥០ ពាន់លានដុល្លារមកត្រឹម ៧១២ ពាន់លានដុល្លារសូម្បីតែ៦៨៧ ពាន់លានដុល្លារនៅឆ្នាំនេះ ដែលធ្វើឱ្យវាក្លាយជាគ្រាដ៏លំបាកសម្រាប់ឧស្សាហកម្មនេះ»។
ចំណែកក្រុមហ៊ុនមូលបត្រ VnDirect រំពឹងថា ការបើកដំណើរការឡើងវិញរបស់ចិន នឹងបង្កបញ្ហាប្រឈមដល់ក្រុមហ៊ុនវាយនភណ្ឌវៀតណាមនៅឆ្នាំនេះ។ បច្ចុប្បន្នចិនគឺជាដៃគូប្រជែងដ៏សំខាន់របស់វៀតណាម នៅក្នុងទីផ្សារសហរដ្ឋអាមេរិក។
បើយោងតាមទិន្នន័យពីការិយាល័យវាយនភណ្ឌនិងសម្លៀកបំពាក់អាមេរិក ការនាំចូលវាយនភណ្ឌនិងកាត់ដេរពីប្រទេសចិនកាលពីឆ្នាំមុនបានកើនឡើងដល់ ១៣២ ពាន់លានដុល្លារ ឬ ២៦ភាគរយនៃការនាំចូលទាំងអស់ ដែលធ្វើឱ្យចិនក្លាយជាអ្នកផ្គត់ផ្គង់ធំបំផុត។ វៀតណាមតាមពីក្រោយនៅចំនួន ១៤,៩ភាគរយ ។
លោក ខាវ ហ៊ូ ហ៊ីវ បាននិយាយថា «ក្រុមហ៊ុនរបស់លោកកំពុងទទួលយកការបញ្ជាទិញក្នុងតម្លៃទាប ដើម្បីរក្សាអតិថិជននិងបុគ្គលិក។ យើងរំពឹងថាទីផ្សារនឹង ងើបឡើងវិញនៅឆមាសទីពីរនៃឆ្នាំនេះដើម្បីទូទាត់សងសម្រាប់ឆមាសទីមួយ»៕(ប្រែសម្រួលដោយ លោកសំណាង)
