កំពង់ស្ពឺ ៖ ជនសង្ស័យ៣នាក់ ដែលជាមុខសញ្ញា ឆក់ខ្សែកមាសនៅទូលក់មាស នៅចំណុចផ្សារត្រពាំងអណ្ដើក ខេត្តតាកែវ ត្រូវបានកម្លាំងអធិការដ្ឋាននគរបាលស្រុកបសេដ្ឋ បានសហការជាមួយកម្លាំងនគរបាលខេត្តតាកែវ ធ្វើការបង្រ្កាបបានកាលពីវេលាម៉ោង២និង២០នាទីរសៀល ថ្ងៃសៅរ៍ ថ្ងៃទី០១ ខែមេសា ឆ្នាំ២០២៣ ។
សមត្ថកិច្ចឱ្យដឹងថា ជនសង្ស័យ៣នាក់រួមមាន ទី១-ឈ្មោះគីម លីហួ ភេទប្រុស អាយុ១៩ឆ្នាំ ជាអ្នកបើកឡាន រស់នៅសង្កាត់និរោធ ខណ្ឌច្បារអំពៅ, ទី២-ឈ្មោះសួន ពុទ្ធរិទ្ធ ហៅវីត ភេទប្រុស អាយុ១៧ឆ្នាំ រស់នៅសង្កាត់ជ្រោយចង្វា ខណ្ឌឫស្សីកែវ និងទី៣-ឈ្មោះលី ខៀងភេទប្រុស អាយុ១៦ឆ្នាំ រស់នៅសង្កាត់ជ្រោយចង្វា ខណ្ឌឫស្សីកែវ ។
កិច្ចប្រតិបត្តិការក្នុងការពួនស្ទាក់និងបង្រ្កាប ក្រុមជនសង្ស័យបានប្រើមធ្យោបាយ រថយន្ត០១គ្រឿងម៉ាក តូយ៉ូតាព្រូស ពណ៌ប្រផេះ ស៊េរីឆ្នាំ២០០៧ ពាក់ស្លាកលេខ ភ្នំពេញ2BP-3306 ។ លុះបើករថយន្តគេចខ្លួន មកដល់ទឹកដីស្រុកបសេដ្ឋ មុខសញ្ញាបានព្យាយាម បេីកគេចពីសមត្ថកិច្ចដេញតាម ពីចំណុចមុខអធិការដ្ឋាននគរបាលស្រុល រហូតដល់ចំណុចជើងភ្នំល្អាង ស្ថិតក្នុងភូមិត្រពាំងធ្លក ឃុំស្វាយចចិប ស្រុកបសេដ្ឋ ខេត្តកំពង់ស្ពឺ ជនសង្ស័យ ដឹងថា មិនមានលទ្ធភាពរត់បាន ក៏ឈប់រថយន្ត រួចរត់គេចខ្លួនឡើងភ្នំល្អាង តែត្រូវបានសមត្ថកិច្ចតាមឃាត់ខ្លួនបាន ។
ក្នុងពេលដេញនោះ ធ្វើឲ្យរថយន្តសមត្ថកិច្ចចំនួន០៣គ្រឿង រងការខូចធ្ងន់ និងរងរបួសមន្រ្តីនគរបាលម្នាក់រួមមាន រថយន្ត ម៉ាកFord រងការខូចខាតកម្រិតធ្ងន់ , រថយន្ត ម៉ាកឡិចស៊ីសRX330 រងការខូចខាតកម្រិតមធ្យម និងរថយន្តម៉ាកព្រូស រងការខូចខាតស្រាល, ចំណែកមន្រ្តីម្នាក់ អនុសេនីយ៍ត្រី យួន សុផា រងរបួសធ្ងន់(សន្លប់) បញ្ជូនទៅសម្រាកព្យាបាលនៅមន្ទីរពេទ្យបង្អែកខេត្តតាកែវ ។
វត្ថុតាងដកហូតពីជនសង្ស័យរួមមាន ៖ រថយន្តម៉ាកព្រូស ពណ៌ប្រផេះ ស៊េរីឆ្នាំ២០០៧ ០១គ្រឿង ធ្វេីសកម្មភាព (ភ្នំពេញ2BP-3306) លោហៈទង់ដែងមួយខ្សែ ។ ចំពោះជនសង្ស័យ កម្លាំងព្រហ្មទណ្ឌស្រុកបសេដ្ឋ បានប្រគល់ជូននគរបាលស្រុកត្រាំកក់ ដើម្បីចាត់ការតាមនីតិវិធីច្បាប់ ៕ ដោយ ៖ គា សំណាង
