បរទេស ៖ ប្រជាជនអ៊ីស្រាអែលរាប់ម៉ឺននាក់ បាននាំគ្នាដង្ហែតាមដងផ្លូវនៃទីក្រុងនានា នៅទូទាំងប្រទេសកាលពីយប់ថ្ងៃអាទិត្យទី២៦មីនាឆ្នាំ២០២៣ ក្នុងការផ្ទុះកំហឹងដោយឯកឯង បន្ទាប់ពីនាយករដ្ឋមន្ត្រី បេនចាមីន ណេតាន់យ៉ាហ៊ូ(Benjamin Netanyahu) បណ្តេញរដ្ឋមន្ត្រីការពារជាតិ របស់លោកភ្លាមៗសម្រាប់ការជំទាស់នឹងផែនការកែប្រែប្រព័ន្ធតុលាការ ។
ក្រុមបាតុករនៅទីក្រុងតែលអាវីវ (Tel Aviv) បានបិទផ្លូវហាយវេដ៏សំខាន់មួយនិងដុតភ្នក់ភ្លើងធំៗជាច្រើនកន្លែង ខណៈប៉ូលិសបានប៉ះទង្គិចជាមួយក្រុមបាតុករដែលប្រមូលផ្តុំគ្នានៅខាងក្រៅផ្ទះឯកជនរបស់លោកណេតាន់យ៉ាហ៊ូ ក្នុងទីក្រុងហ្ស៊េរុយសាឡិម។
បាតុកម្មនេះកាន់តែធ្វើឱ្យផុងជម្រៅនូវវិបត្តិជាច្រើនខែ ជុំវិញផែនការរបស់លោកណេតាន់យ៉ាហ៊ូ ក្នុងការជួសជុលប្រព័ន្ធតុលាការ ដែលបានបង្កឱ្យមានការតវ៉ាទ្រង់ទ្រាយធំ ជាហេតុនាំឱ្យមានការបារម្ភ ពីសំណាក់មេដឹកនាំអាជីវកម្មនិងអតីតប្រធានសន្តិសុខ និង ទាក់ទាញការព្រួយបារម្ភពីសហរដ្ឋអាមេរិក និង សម្ពន្ធមិត្តជិតស្និទ្ធផ្សេងទៀត។
ចំពោះការបណ្តេញរដ្ឋមន្ត្រីក្រសួងការពារជាតិ លោក យ៉ូវ ហ្គាលែន (Yoav Gallant) បានបង្ហាញសញ្ញាថា «នាយករដ្ឋមន្ត្រីនិងសម្ពន្ធមិត្តរបស់គាត់នឹងនឹងសម្រុកធ្វើផែនការផ្លាស់ប្តូររូបគាត់នៅសប្តាហ៍នេះ»។ លោកហ្គាលែនបានក្លាយជាសមាជិកជាន់ខ្ពស់ដំបូងគេនៃគណបក្សកាន់អំណាច លីឃុត (Likud) ដែលចេញមុខប្រឆាំងនឹងការកែប្រព័ន្ធតុលាការ ដោយនិយាយថា ការបែកបាក់ដ៏ជ្រៅនេះកំពុងគំរាមធ្វើឱ្យយោធាចុះខ្សោយ។
ខណៈក្រុមអ្នកតវ៉ាបានជោរជន់ពេញដងផ្លូវរហូតដល់យប់ជ្រៅ ក្រុមរដ្ឋមន្ត្រីរបស់បក្សលីឃុត បានចាប់ផ្តើមបង្ហាញឆន្ទៈក្នុងការផ្អាកការអនុវត្តផែនការ។ រដ្ឋមន្ត្រីក្រសួងវប្បធម៌ លោក មីកគី ហ្សូហា (Micky Zohar) ជាមនុស្សជំនិតរបស់លោកណេតាន់យ៉ាហ៊ូ បាននិយាយថា «គណបក្សនឹងគាំទ្រគាត់ ប្រសិនបើគាត់សម្រេចចិត្តផ្អាកការកែប្រែប្រព័ន្ធតុលាការ»។
ចំណែកប្រព័ន្ធផ្សព្វផ្សាយអ៊ីស្រាអែលបាននិយាយថា មេដឹកនាំក្នុងក្រុមចម្រុះរបស់លោកណេតាន់យ៉ាហ៊ូ នឹងជួបគ្នានៅព្រឹកថ្ងៃចន្ទនេះ ហើយនៅរសៀលថ្ងៃចន្ទ ចលនាតវ៉ាដ៏ធំនេះនិយាយថា ខ្លួននឹងធ្វើមហាបាតុកម្មមួយទៀតនៅខាងក្រៅវិមាន Knesset ឬវិមានសភាក្នុងក្រុងហ្ស៊េរុយសាឡិម៕ (ប្រែសម្រួលដោយលោកសំណាង)
