ភ្នំពេញ ៖ ជនសង្ស័យ២នាក់ជាមុខសញ្ញាគាស់ផ្ទះប្រជាពលរដ្ឋ ត្រូវបានកម្លាំងនគរបាលប៉ុស្ដិ៍ត្រពាំងក្រសាំងល្បាតប្រទះឃើញនិងឃាត់ខ្លួន រួមជាមួយវត្ថុតាងមួយចំនួន ខណៈកំពុងធ្វើសកម្មភាព កាលពីវេលាម៉ោង ១និង ១៥នាទីយប់ឈានចូលថ្ងៃទី១៩ ខែមីនា ឆ្នាំ២០២៣ ស្ថិតនៅភូមិ-សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចនិយាយថា ជនសង្ស័យទី១-ឈ្មោះ ទូច សុខន ភេទប្រុស អាយុ៤៣ឆ្នាំ មុខរបរបើកបរផាស់អាប់និងទី២-ឈ្មោះ ភឹម ភារុណ ភេទប្រុស អាយុ១៩ឆ្នាំ មុខរបរមិនពិតប្រាកដ។
សមត្ថកិច្ចបន្តថា ដោយមានកាបញ្ជាពីលោកវរសេនីយ៍ឯក ម៉ន វុធី អធិការនគរបាលខណ្ឌពោធិ៍សែនជ័យ កម្លាំងប៉ុស្តិ៍ត្រពាំងក្រសាំង ដឹកនាំដោយលោក នាង ឧត្តម នាយប៉ុស្តិ៍ បានចុះល្បាតនៅក្នុងមូលដ្ឋាន ស្រាប់តែប្រទះឃើញជនសង្ស័យ០២នាក់ កំពុងធ្វើសកម្មភាពគាស់ផ្ទះប្រជាពលរដ្ឋ ក៏ឃាត់ខ្លួនព្រមទាំងដកហូតវត្ថុតាំងមាន ដែកកាប់ ,ទួណឺវីស ,កូនសោ,កាំបិត និង ឧបករណ៍មួយចំនួនទៀត។
បច្ចុប្បន្នជនសង្ស័យត្រូវកម្លាំងនគរបាលប៉ុស្តិ៍ត្រពាំងក្រសាំង សាកសួរដេីម្បីកសាងសំណុំរឿងបញ្ជូនទៅផ្នែកជំនាញនៃអធិការខណ្ឌពោធិ៍សែនជ័យដើម្បីអនុវត្តនីតិវិធី៕(ដោយ សំណាង៩៦)
