ភ្នំពេញ ៖ អគ្គីភ័យបានឆាបឆេះ យានដ្ឋានជួសជុលរថយន្ត ហ្គោលធិច (Gold Tech) កាលពីវេលាម៉ោង ២និង៥០នាទី យប់រំលងអធ្រាត្រ ថ្ងៃអង្គារ៍ ទី១៤ ខែមីនា ឆ្នាំ២០២៣ ចំណុចដីឡូលេខ៣៨ ផ្លូវ៦០៨ ក្រុម៥៣ ភូមិ០៩ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
សមត្ថកិច្ចឱ្យដឹងថា ម្ចាស់ទីតាំងឈ្មោះគិត ចិន្តា ភេទប្រុស អាយុ៤១ឆ្នាំ ជនជាតិខ្មែរ មុខរបរម្ចាស់យានដ្ឋានជួសជុលរថយន្ត ។ ប្រភេទសំណង់ដែលឆេះសង់អំពីថ្មបេតុងប្រក់ស័ង្កសី ទំហំ ១៥ម៉ែត្រគុណនឹង៣០ម៉ែត្រ បណ្តាលឱ្យឆេះខូចខាតរថយន្តToyota Pruise ២០០៥ ពណ៌មាស ចំនួន ០១គ្រឿង, ម៉ាក Ford Transit ២០១៩ពណ៌ស ចំនួន ០១គ្រឿង, ម៉ូតូម៉ាកHonda wave ចំនួន០១គ្រឿង, ប្រេងម៉ាស៊ីន Castrol ចំនួន ៣០កេស។
នៅវេលាម៉ោង ៣និង៥០នាទីទៀបភ្លឺ នាថ្ងៃខែឆ្នាំដដែល អគ្គីភ័យនេះ ត្រូវបានពន្លត់បានទាំងស្រុង ដោយប្រើប្រាស់រថយន្តការិយាល័យអគ្គិភ័យ រាជធានីភ្នំពេញ ចំនួន ១២គ្រឿង ប្រើប្រាស់ទឹកអស់ ១៥ឡាន ស្មើនឹង ៦០ម៉ែត្រគូប និងរថយន្តជំនួយមកពីក្រុមហ៊ុន ស្រាបៀរកម្ពុជា ចំនួន ១គ្រឿង ប្រើប្រាស់ទឹកអស់ ១ឡាន ស្មើនឹង ០៦ម៉ែត្រគូប ៕ ដោយ ៖ ធ្នូជ័យ
