ភ្នំពេញ ៖ រថយន្តក្រុងមួយគ្រឿង បានឆាបឆេះទាំងស្រុង បង្កការភ្ញាក់ផ្អើល សមត្ថកិច្ចចុះធ្វើការអន្តរាគមន៍ កាលពីវេលាម៉ោង ១និង២០នាទីរំលងអធ្រាត្រ ឈានចូលថ្ងៃទី១១ ខែមីនា ឆ្នាំ២០២៣ ត្រង់ចំណុចខាងក្រោយ ផ្សារបឹងបៃតង តាមបណ្ដោយផ្លូវបេតុង ក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ ។
រថយន្តខាងលើ ជាប្រភេទរថយន្តក្រុង ៤៥កៅអី ពាក់ស្លាកលេខ ភ្នំពេញ 2B-1459 បានរងការឆាបឆេះទាំងស្រុងដោយសារមូលហេតុ សង្ស័យឆ្លងចរន្តភ្លើង ពីក្បាលអាគុយរបស់រថយន្ត ។
ប្រភពព័ត៌មានពីប្រជាពលរដ្ឋ ដែលរស់នៅក្បែរកើតហេតុឲ្យដឹងថា រថយន្តក្រុងខាងលើ បានមកឈប់ចតទុកចោលនៅត្រង់ចំណុចកេីតហេតុ អស់រយៈពេលយូរមកហើយ ។ កន្លងមកប្រជាពលរដ្ឋ ក៏ធ្លាប់រាយការណ៍ជូនអាជ្ញាធរមូលដ្ឋាន ប៉ុន្តែនៅតែមិនឃើញម្ចាស់ មកបើកយករថយន្តនោះចេញពី កន្លែងកើតហេតុនោះទេ។
ក្រោយកើតហេតុ សមត្ថកិច្ចបានចុះអន្តរាគមន៍ និងបាញ់ទឹកពន្លត់ ទប់ស្កាត់មិនឱ្យឆាបឆេះរាលដាល ដល់ផ្ទះជិតខាងនោះទេ ហើយចំពោះមូលហេតុ សមត្ថកិច្ចបានសនិ្នដ្ឋានជំហានដំបូង បណ្ដាលមកពី«ឆ្លងក្បាលអាគុយរថយន្ត»៕ដោយសំណាង៩៦
