កោះកុង ៖ ជនសង្ស័យម្នាក់ចំណោម២នាក់ ត្រូវបានសមត្ថកិច្ចឃាត់ខ្លួនបន្ទាប់ពីមានទំនាស់ជាមួយបុរសភាគីម្ខាងហើយយកកាំបិតចាក់ជាច្រើនកន្លែងបណ្តាលឱ្យស្លាប់កើតឡើង កាលពីថ្ងៃចន្ទ ទី៦ ខែមីនា ឆ្នាំ២០២៣ វេលាម៉ោង៣និង៤០ នាទីទៀបភ្លឺ នៅចំណុចមុខក្លោងទ្វារសួនសត្វ ស្ថិតក្នុងភូមិចាំយាម ឃុំប៉ាក់ខ្លង ស្រុកមណ្ឌលសីមា ខេត្តកោះកុង ។
សមត្ថកិច្ចនិយាយថា ជនរងគ្រោះឈ្មោះ បឿន ប៊ុនហេង ភេទប្រុស អាយុ២៣ឆ្នាំ មុខរបរកម្មករ ស្នាក់នៅភូមិ-ឃុំខាងលើ និងរបួសស្រាលម្នាក់ ឈ្មោះ ហេង ចាន់ដារ៉ា ភេទប្រុស អាយុ១៩ឆ្នាំ ស្នាក់នៅ ភូមិ-ឃុំកើតហេតុខាងលើ ។
ចំណែកជនសង្ស័យមានគ្នា២នាក់រួមមាន ទី១-ឈ្មោះ ហេង សៅឌី ភេទប្រុស អាយុ ៣៧ឆ្នាំ មុខរបរចុងភៅចិន ភូមិ-ឃុំកើតហេតុខាងលើ (រត់គេចខ្លួន) និងទី២-ឈ្មោះ ហ៊ុយ ហៃទី ភេទប្រុស អាយុ២៤ឆ្នាំ មុខរបរចុងភៅចិន ស្នាក់នៅអគារចិន ភូមិ-ឃុំកើតហេតុខាងលើ (ឃាត់ខ្លួន) ។
សមត្ថកិច្ចបន្តថា ជនសង្ស័យទាំង២នាក់បានធ្វើសកម្មភាព យកកូនកាំបិតចាក់ទៅជនរងគ្រោះ បណ្ដាលឱ្យរងរបួសធ្ងន់ដោយសារទំនាស់ ហើយបានស្លាប់ពេលបញ្ជូនមកព្យាបាលនៅមន្ទីរពេទ្យ។ ករណីនេះកម្លាំងនគរបាលជំនាញស្រុកមណ្ឌលសីមា នៃស្នងការដ្ឋាននគរបាលខេត្តកោះកុង ឃាត់ខ្លួនបានជនសង្ស័យម្នាក់ ឯម្នាក់ទៀតបានរត់គេចខ្លួន ។
បច្ចុប្បន្នសមត្ថកិច្ចបានបំពេញសំណុំរឿងតាមនីតិវិធីច្បាប់ និងកំពុងស្រាវជ្រាវរកជនសង្ស័យបន្តទៀត ៕(ដោយប៉ូច គឹមសុខ)
