ភ្នំពេញ ៖ មានករណីគ្រោះថ្នាក់ចរាចរណ៍រវាងម៉ូតូនិងម៉ូតូ បណ្តាលឱ្យរបួសមនុស្ស២ នាក់ កើតឡើងនាថ្ងៃសៅរ៍ ទី០៤ខែមីនា ឆ្នាំ២០២៣ វេលាម៉ោង៧និង១០នាទីយប់ ត្រង់ចំណុចកែងផ្ទះលេខ១៥៤ លើផ្លូវបេតុង១១២ ភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ ។
សមត្ថកិច្ចមូលដ្ឋាននិយាយថា ភាគីម៉ូតូម៉ាក FZ ពណ៌ខ្មៅ ពាក់ស្លាកលេខ ភ្នំពេញ ១BQ ៣២២៩ បើកបរដោយឈ្មោះផុន លីដា ភេទប្រុស អាយុ២៥ឆ្នាំ មុខរបរនៅផ្ទះ ស្នាក់នៅតាមផ្លូវបេតុង១១២ ភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ បើកបរឆ្លងផ្លូវបេតុង១១២ ទិសដៅពីជើងទៅត្បូង ។
លុះបើកបរមកដល់ត្រង់ចំណុចកើតហេតុខាងលើ បុកជាមួយ ម៉ូតូមួយគ្រឿង ម៉ាក VIVA ពណ៌ខ្មៅ ពាក់ស្លាកលេខយ៦៥២១-ភព១ បើកបរដោយឈ្មោះ សួស សុខន ភេទស្រី អាយុ៦០ឆ្នាំ មុខរបរនៅផ្ទះ ស្នាក់នៅតាមផ្លូវបេតុង១១២ភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ បើកបរលើផ្លូវបេតុង១១២ ទិសដៅ ត្បូងទៅជើងបណ្តាលឱ្យរបួសធ្ងន់ស្រីម្នាក់ អ្នកបើកបរម៉ូតូ VIVA ពណ៌ខ្មៅ ត្រូវយកទៅសម្រាកនៅមន្ទីរពេទ្យណាត្រាបឹងទំពុននិងរបួសស្រាលម្នាក់ អ្នកបើកបរ ម៉ូតូFZ ត្រូវយកទៅមន្ទីរពេទ្យ បង្អែកច្បារអំពៅ ។
បច្ចុប្បន្នយានយន្តទាំង២ ត្រូវយកមករក្សាទុកនៅអធិការដ្ឋាននគរបាលខណ្ឌ ច្បារអំពៅ ដេីម្បីចាត់ការនីតិវិធីបន្ត ។ចំពោះមូលហេតុដែលបង្កឱ្យគ្រោះថ្នាក់ចរាចរណ៍ គឺមកពីអ្នកបេីកបរ ម៉ូតូ FZ បើកបរមិនប្រកាន់ចំណែកផ្លូវរបស់ខ្លួន៕ដោយ ធ្នូជ័យ
