ភ្នំពេញ ៖ តារាចម្រៀងជើងចាស់ដ៏ល្បីឈ្មោះ លោកណយ វណ្ណា បានបើករថយន្តម៉ាកLexusRX330មួយគ្រឿងយ៉ាងលឿន រួចរេចង្កូតបុករបាំងថ្មគល់ស្ពានអាកាសក្បាលថ្នល់ បណ្តាលឱ្យរថយន្តខ្ទេចមួយកំណាត់មុខទាំងស្រុង បង្កការភ្ញាក់ផ្អើលដល់សមត្ថកិច្ចនៅត្រង់ចំណុចមុខអគ្គស្នងការនគរបាលជាតិ តាមមហាវិថីព្រះនរោត្តម ស្ថិតក្នុងសង្កាត់ទន្លេបាសាក់ ខណ្ឌចំការមន កាលពីវេលាម៉ោង១២និង២០នាទីរំលងអធ្រាត្រ ចូលថ្ងៃទី០២ ខែមីនា ឆ្នាំ២០២៣ ។
បើតាមប្រភពព័ត៌មានពីប្រជាពលរដ្ឋដែលឃើញហេតុការណ៍នេះបានប្រាប់ឱ្យដឹងថា មុនកើតតហេតុគេឃើញរថយន្តម៉ាក Lexus RX330 ពណ៌ស្ករ មួយគ្រឿង ពាក់ស្លាកលេខភ្នំពេញ 2BF-7616បើកបរដោយតារាចំរៀងជើងចាស់ម្នាក់ឈ្មោះណយ វណ្ណា ធ្វេីដំណើរតាមមហាវិថីព្រះនរោត្តម ទិសដៅពីជើងមកត្បូងក្នុងល្បឿនយ៉ាងលឿន ។
លុះមកដល់ចំណុចកើតហេតុ ស្រាប់តែេរចង្កូតមកខាងស្ដាំដៃជ្រុលទៅបុករបាំងថ្មគល់ស្ពានអាកាសក្បាលថ្នល់ចំពាក់កណ្តាលរថយន្តពេញទំហឹង បណ្ដាលឱ្យរថយន្តបង្កខ្ទាតមកក្រោយវិញបន្តិចខ្ទេចមួយកំណត់មុខ សំណាងដែរមិនបង្កគ្រោះថ្នាក់ដល់មនុស្សណាម្នាក់ឡើយ។
ក្រោយកើតហេតុ តារាចម្រៀងលោកណយ វណ្ណា ដែលជួបគ្រោះថ្នាក់ចរាចរណ៍ខាងលើ ត្រូវបានកូនក្មួយដឹកយកទៅផ្ទះ ។ រីឯរថយន្តបង្កវិញ ត្រូវបានសមត្ថកិច្ចមូលដ្ឋាន សហការជាមួយមន្ត្រីជំនាញធ្វេីការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ជំនាញផ្លូវគោក រាជធានីភ្នំពេញ រង់ចាំដោះស្រាយបន្តនៅពេលក្រោយ៕ដោយ ធ្នូជ័យ
