ភ្នំពេញ ៖ មានករណីគ្រោះអគ្គីភ័យឆេះផ្ទះប្រជាពលរដ្ឋមួយខ្នង កើតឡើងនៅចំណុចផ្លូវលេខ៣៧១ ភូមិម័រ សង្កាត់-ខណ្ឌដង្កោ រាជធានីភ្នំពេញ បង្កការភ្ញាក់ផ្អើលនាវេលាម៉ោង ៩និង៥០នាទីយប់ ថ្ងៃចន្ទ ទី២០ ខែកុម្ភៈ ឆ្នាំ២០២៣ ដោយមូលហេតុឆ្លងចរន្តអគិ្គសនី។
សមត្ថកិច្ចនិយាយថា ម្ចាស់ទីតាំងឈ្មោះមឿន ធីតា ភេទស្រី អាយុ៣១ឆាំ្ន សញ្ជាតិខែ្មរ មុខរបរលក់គ្រឿងបន្លាស់ស្នាក់នៅផ្ទះកើតហេតុខាងលើ។ ប្រភេទសំណង់ដែលឆេះសង់អំពីថ្មប្រក់ស័ង្កសី មានទំហំ៨ម៉ែត្រគុណនឹង១២ម៉ែត្របណ្តាលឱ្យឆេះសម្ភារប្រើប្រាស់អស់ទាំងស្រុង តែពុំបានឆេះរាលដាលដល់ផ្ទះអ្នកជិតខាងឬរបួសដល់មនុស្សឡើយ ។
ភ្លាមៗនោះមានរថយន្តការិយាល័យពន្លត់អគ្គិភ័យ ចំនួន៥គ្រឿង ប្រើប្រាស់ទឹកអស់ចំនួន ០៥ឡាន ស្មើនឹង២០ម៉ែត្រគូបនិង រថយន្តជំនួយអន្តរាគមន៍ក្រុមហ៊ុនស្រាបៀរកម្ពុជាចំនួន ០១គ្រឿងប្រើប្រាស់ទឹកអស់ចំនួន ០១ឡាន ហើយពន្លត់ចប់នៅម៉ោង ១០និង២០នាទី នាថ្ងៃខែឆ្នាំដដែល៕(ដោយ ធ្នូជ័យ)
